Россияның Президентизиниң Сибирьде бүрүн эргелиг төлээзиниң оралакчызы Сергей Грызыхин ажыл албан аайы-биле Тыва Республикада келген. Тываның Баштыңы Владислав Ховалыг-биле республиканың экономика адырының кол угланыышкыннар база социал адырның айтырыгларын сайгарып чугаалашкан.
Владислав Ховалыг чаа өөредилге чылынга белеткел чедиишкинниг доозулганын чугаалаан. Тывада беш чаа школа, капитал септелге соонда чаартынган алды школа ажыттынар. Республиканың ЧЭК, ЧКА база социал адыр объектилериниң кел чыдар одалга үезинге белеткелин база таныштырган. Бүрүн эргелиг төлээниң оралакчызы Тывада боттандырып турар чугула шупту төлевилелдер — орук септелгези, чуртталга бажыңнарының база социал объектилер тудуу, ЧКА чаартылгазы база көдээ ажыл-агый хөгжүлдезиниң дугайында медээни бирги удуртукчулардан билип алган. Тускай шериг операциязының киржикчизи шериг албаныгларны болгаш оларның өг-бүлелерин деткиир айтырыгже онза кичээнгейни ужуражылга үезинде салган.
Владислав Ховалыг регионнуң турум хөгжүлдезинге болгаш тус чер чурттакчыларының амыдырал чуртталгазының деңнелин бедидеринге идиг берген хемчеглерни база салдынган сорулгаларны чедип алырынга кол рольду ойнап турар федералдыг структураларның болгаш регионалдыг эрге-чагырганың демниг ажылын доктаамал деткип чорууру дээш, Россияның Президентизиниң бүрүн эргелиг төлээзи Анатолий Серышевке база төлээниң чериниң аппарадынга четтиргенин илереткен.
«Регионнуң турум хөгжүлдезинге, хамаатыларның амыдырал-чуртталгазының шынарынга бедидеринге демниг ажыл херек — деп, ужуражылга соонда демдеглээн. — Россияның Президентизиниң Сибирь федералдыг округда бүрүн эргелиг төлээ чери «Сибирь дугуржулгазы» регионнар аразының ассоциациязы-биле кады ол угланыышкында Сибирь регионнарның күжениишкиннерин мөөңнээн. Тыва бүрүн эргелиг төлээ черинден база Анатолий Анатольевич Серышевтиң бодундан республиканы хөгжүдеринче угланган дыка хөй инициативалар боттандырылгазынга деткимчени кезээде ап чоруур».