Тываның Баштыңы Чеди-Хөл кожуунга чорааш, оон кыйгырткан ТШО киржикчилери-биле ужурашкан. Олар тускай шериг операциязының зоназынга албан хүлээлгезинден халашкаш, чоокта чаа-ла чанып келген база госпитальдарьга эмнеткен соонда төрээн черинге дыштаныр дээш келгеннер деп, Владислав Ховалыг бодунуң блогунда оларның дугайында дыңнаткан.
«Шериг албан хүлээлгезин канчаар эрттиргенин, кандыг айтырыгларлыгыл, ам кандыг бергедээшкиннерге таваржып турарының дугайында чугаалаштывыс. Төрээн кожуунунуң болгаш республиказының дугайында үзел-бодалын база сагыш-сеткилин билип алыры солун болду. Хөй-ниити амыдыралындан чыда калбайн, бодунуң чону, чурту дээш сагыш аарып, боттарының үлүүн киириштиреринге беленнер. Кожууннуң удуртулгазы Сайлыг суурда ТШО хоочуннарынга дээш аңгы кудумчуну шыйган, ында инженерлиг коммуникацияга белеткел ажылдары чоруп турар. Бүгү талалыг деткимчени болгаш дузаламчыны ам-даа көргүзерин онаадым» - деп, республика баштыңы болган чугааны дамчыткан.
«Маадырларның үези» президент программазы-биле тускай шериг операциязының хоочуннарындан кадрлар белеткээр «Тываның маадырлары» төлевилел сентябрь 2-де эгелээнин Владислав Ховалыг сагындырган. Удуртулга ажылдарынга салым-чаяаным бар деп санап чоруур, ТШО-га киржип чораан шупту чаңгыс чер чурттугларын төлевилелге киржир кылдыр республика баштыңы кыйгырган: «Регионалдыг яамылар болгаш ведомстволар удуртукчуларындан, арга-дуржулгалыг болгаш чаартыкчы үзел-бодалдыг башкарыкчылардан дагдыныкчыларны тодараткан. Бистиң маадырларывысты деткиир дээш болдунар-ла чүүлдерни кылыр бис».
Август 28-те, Шериг эмчиниң хүнүнде, Владислав Ховалыг 55-ки аңгы гвардейжи мотоадыгжы бригаданың эмчилери-биле ужурашкан. Эмчи ротазының начальниги Ахмед Максидов-биле бригаданың медпунктузунуң начальниги Салим Чадамба, ооң ажылдакчылары Айдысмаа Хомушку, Тайя Кыргыс база Айдыс Куулар байыр чедириишкиннерин алган.
Олар шупту ТШО-ну эрткен болгаш коллегаларынга база республика баштыңынга чугаалаар чүүлдери бар. Тайяның төөгүзү тускай: дизайнер мергежилдиг уруг кажан бир шагда шериг эмчи сестразы апарып, ок-боо адаандан балыгланган дайынчыларны камгалаарын кажанда-даа бодавайн чораан. Ол республиканың күрүнениң чуртталга инспекциязынга, «Тывахамаатытөлевилелге» ажылдап, амгы үеде албан хаап турары шериг кезээниң дөзевилелин кылырынга киришкен. Айдысмаа Хомушкунуң ийи кады төрээннери база тускай шериг операциязында киржип турар.
«Бо аныяк оолдар, уругларның эрес-дидим болгаш албан хүлээлгезинге бердингениниң ачызында, дыка хөй бистиң дайынчыларывыс онча-менди ээп чанып келгеннер» - деп, Владислав Ховалыг бодунуң блогунда бижээш, шериг эмчилерниң маадырлыг чоруун онзагайы-биле мөңгежидер херек деп демдеглээн. Ындыг ажыл чоруп турар –Владимир Путин-биле ужуражылга үезинде билдинген Айдысма Монгуштуң төөгүзү-биле уран-чечен кинону тырттырып турар. Тускай шериг операциязының дайынчыларынга мөгейиг кылдыр республиканың шылгараңгай скульпторлары Тываның найысылалынга тураскаалды шуткуп турарлар.