Бо чылдың сентябрь 10-11 хүннеринде Моолдуң найысылалынче делегей чергелиг сөөлгү «чайгы» ужудуушкунну планнаан. Республикада чаа угланыышкын болганда, чурттакчы чоннуң хереглелин көрүп, рейсти чайгы шөлээ үезинде ажылдадыр шиитпир хүлээп алган.
Чаа угланыышкын дыка нептереңгей дээрзин шинчилел көргүскен. Тыва Республиканың Чазааның тускайлаан субсидияларының ачызында авиабилеттер өртээ садып алган хүнүнден хамааржып, 7500 рубльден өрү болуп, дыка хөй улустуң дыштанырынга таарымчалыг болган. Пассажирлер аргыжылгазы сезон аайы-биле кышкы үеде эвээжей бээрин барымдаалап, келир чылын рейсти катап эгелеп, ужудуушкуннар санын неделяда ийи чедир көвүдедир аргаларны сайгарып турар.
«КрасАвиа» АН авиакомпания июньнуң 25-те Кызылдан Моолче бирги делегей чергелиг рейс-биле ужуткан. Кызыл биле Моолдуң найысылалы Улан-Батор аразынга неделя санында ужудуушкуннарны организастаан турган.
"Тыва бо төлевилелге херек инфраструктураны тургузарынга – ужудуп-хондурар шөлдү чаартырындан эгелээш, каайлы-кызыгаар ажылынга аңгы терминалды тударынга чедир үр үеде тура-соруктуг ажылдаан. Чурттуң Президентизиниң болгаш Россияның Чазааның деткимчези-биле ону чедип алган бис" - деп, Владислав Ховалыг ынчангы ол болуушкунну тайылбырлаан.
Эрткен чылдың сентябрьда Кызылдан бирги делегей чергелиг рейс ужуп үнген. Владимир Путин Тывага ажыл албан аайы-биле кээп чорааш, Кызылдан Моолдуң найысылалы Улан-Баторже ужуп үнген. Ынчалдыр ол Тываның аэропортунга делегей чергелиг секторну ажылдадырынга албан езунуң стартын берген.