Тываның Баштыңы Владислав Ховалыг 2026 чылда республикага болуп эртер IV-кү делегей чергелиг буддийжи шуулганга белеткелди сайгарган хуралды эрттирген. Ужуражылганың киржикчилери организастыг хемчеглерниң баш бурунгаар планын сайгарган. Амгы үеде аңаа чүгле ажыл-агыйжы программалыг эвес, а аалчыларны хүлээп алырынга республиканың болгаш ооң төвүнүң комплекстиг чаагайжыдылга хемчеглери кирген «орук картазын» ажылдап турары демдеглеттинген.
Тывага IV делегей чергелиг буддийжи шуулганны эрттирер дээн эгелээшкинни Россияның Президентизи Владимир Путин, ол ышкаш буддизм өөредиинге болгаш эртем-шинчилелдеринге дузаламчы фондузу деткээнин Владислав Ховалыг демдеглээн.
«Шуулган аңгы-аңгы чурттарда сарыг шажын ниитилелдериниң аразында арга-дуржулга солчулгазының, амгы үениң айтырыгларын сайгарарының болгаш харылзааны быжыглаарының онзагай шөлү апаар. Даштыкы чурттардан делегациялар, ол ышкаш Россияның эртем ниитилелиниң болгаш чурттуң буддийжи регионнарының төлээлери шуулганга киржир. Бистиң культуравыстың эртине байлаан болгаш шажын чүдүлгелер аразында билчилгелиг чөпшээрежилгени аалчыларга көргүзери чугула» - деп, Владислав Ховалыг демдеглээн.
Бурятияга I, II делегей чергелиг буддийжи шуулганнар болуп эрткенин сагындыраал. 2023 биле 2024 чылдарда Индия, Кыдат, Вьетнам, Таиланд, Мьянма, Шри-Ланка, Лаос, Непал, Моол, Бангладеш, Камбоджа база Бутан дээш, 14 даштыкы чурттардан делегаттар аңаа киришкен. Сентябрьда Калмыкия Республикага делегей чергелиг III буддийжи шуулган болуп эртер.
Февраль 13-те Москвага «Буддийжи өөредилгени болгаш эртем-шинчилелдерин деткиир» фондунуң тургузукчулар чөвүлелиниң хуралынга «Буддизмниң үндезини болгаш амгы үеде сорулгалары» деп IV-кү делегей чергелиг буддийжи шуулганны Тывага эрттирер дугайында шиитпир хүлээп алдынган.
Россияның Президентизи Владимир Путин 2024 чылдың сентябрьда республикага аалдап чорааш, онзагай шажын-чүдүлге хемчээн эрттирер дээн регионнуң сарыг шажын ниитилелиниң эгелээшкинин деткээн.
Республиканың Баштыңы Санкт-Петербургтуң делегей чергелиг экономиктиг форумунуң үезинде Непалдың элчини Джанга Бахадур Чаухан-биле база август эгезинде Тывага аалдап чораан Калмыкияның делегациязы-биле улуг хемчээлдиг хемчегге белеткелге хамааржыр элээн каш ажыл-агыйжы ужуражылгаларны эрттирген.