Регионалдыг диспетчер албан чериниң медээзи-биле алырга, август 29-туң эртенги шагында, Тыва Республиканың арга-арыг фондузунда ниитизи-биле 46,6 га черде 3 арга-арыг өрттери хып турар. Хову өрттери бүрүткеттинмээн.
Чыраа-Бажының, Чадаананың арга-арыг ажыл-агыйларының участоктарында 46 га ниити шөлдүг, ол ышкаш Бай-Тайга кожууннуң арга-арыг ажыл-агый участогунда 0,6 га черде арга-арыг өрттер бар.
Өрттер өжүреринде 47 кижи, 11 санныг техника киржип турар. Тыва Республиканың Арга-арыг яамызының курлавырында 208 кижи, 124 санныг техника бар. Омск областың “Авиалесоохрана” ажылдакчылары арга-арыг өрттерин өжүреринге база хаара туттунган.
«Арга-арыг өрттериниң байдалы экижээни-биле, регионалдыг онза байдал чурумун август 28-те соксаткан. Өрт айыылы-биле демисежип келген “Авиалесоохрана” ажылдакчыларының көвей кезии дүүн чаныпкан» - деп, Тываның арга-арыг сайыды Григорий Ондар чугаалаан.
Арга-арыгларда өртке удур айыыл чок чорукту хандырары-биле, арга-арыгга хамаатыларның чоруурунга база автотранспорт аймааның ынаар киреринге чамдык кызыгаарлыг өртке удур онза чурум республикада уламчылавышаан. Тываның Арга-арыг яамызының, кожууннарда арга-арыг ажыл-агыйларының берген бижии-биле арга-арыг девискээрлеринче кирип болур. Регионнуң Чазааның 2025 чылдың август 28-те №428 доктаалы-биле өртке удур тускай чурумну 2025 чылдың сентябрь 17-ге чедир узаткан.