Тываның Чазаа билдинмес чүүлдүң чазылганындан бир элээди оолдуң чок болганынга база ийиги оолдуң кемдеп-берттингенинге хамаарыштыр истелгени хайгааралда алганын Республика Чазааның Даргазының оралакчызының хүлээлгезин күүседип турар Айдыс Сынаа дыңнаткан.
«Корум-чурум камгалаар органнар айыыл-халап болган черде шупту байдалдарны тодарадыр дээш ажылдап турар. Назы четпээннер херектериниң талазы-биле ведомстволар аразының комиссиязының төлээлери база ында. Айыыл чок чорукту хандырар дээш, онза байдал болган черни долгандыр дуглаан. Бо айыыл-халаптың бүгү-ле байдалдарын: ол чүү чүве болганын, аңаа канчап чеде бергенин база ол дээш кым харыысалгалыын тодарадыр бүгү-ле ажылды кылыр бис. Истелгени кончуг кичээнгейлиг ханы болгаш боттуг чорудар» - деп, вице-премьерниң хүлээлгезин күүседип турар Сынаа демдеглээн. Оон аңгыда эмнелгеже кирген элээди оолдуң байдалын эмчилер хайгааралда алганын база амгы үеде аңаа херек бүгү-ле дузаны көрүүзүп турарын дыңнаткан. Кемдээн оолдуң байдалы ортумак, кандыг эмнээшкин бээри тодараттынган.
«Ада-иелерге, хоойлу езугаар төлээлерге, башкыларга дыңнадып тур мен. Уругларга болгаш элээдилерге билдинмес чүүлдер тып алзы, айыыл чок чоруктуң дүрүмнериниң дугайында тайылбыр ажылын чорударын күштелдирер херек. Ажы-төлүвүстү ындыг айыыл-халаптардан камгалаары-биле шупту чүүлдерни кылыр хүлээлгелиг бис» - деп, Сынаа айыткан.
Август 28-тиң хүнүнде 14 шак үезинде озал-ондак болган. Кызыл кожууннуң Сукпак суурнуң чоогунда билдинмес чүүл чазылганындан алган кемдээшкиннеринден назы четпээн кижи амы-тынындан чарылган, а ийи дугаары балыгланган дугайында медээ корум-чурум камгалаар органнарже кирген. РФ-тиң Истелге комитединиң Тыва Республика талазы-биле Истелге комитединиң онза чугула херектер талазы-биле истелгези ол болуушкунга хамаарыштыр истелге ажылдарын эгелээн.