Август 28-тиң хүнүнде республика девискээринде 38 га шөлдүг 2 арга-арыг өртү хып турарын регионалдыг диспетчер албаны дыңнаткан. Эрткен хүнде 51 га ниити шөлдүг 3 арга-арыг өртүн өжүрген. Хову өрттери демдеглеттинмээн. Августуң 27-де Таңды кожууннуң Краснояровка арбандан ырак эвеске чаңнык дүшкенинден ховуга үнген 1 өрттү кончуг дүрген чок кылган.
Чыраа-Бажының арга-арыг участогунуң 37 газында база Чадаананың арга-арыг участогунда 1 га черге хыпкан өрттерни өжүреринге 24 кижи база 6 техника аймаа киришкен.
Тыва Республиканың арга-арыг яамызының курлавырында 229 кижи база 125 санныг техника бар. Тывада “Авиаарга-арыгкамгалалының” Красноярск край, Омск база Иркутск областардан, Бурят, Хакас республикалардан, Приволжьеден өртчүлер Тывада ам-даа ажылдавышаан.
Тываның Чазааның 2025 чылдың август 19-та 405 дугаарлыг доктаалы езугаар, 2025 чылдың сентябрь 8-ке чедир республикада онза чурумну чарлап, Тыва Республиканың девискээринде арга-арыгларның өртке удур камгалалын хандырары сорулга-биле арга-арыгже хамаатыларның болгаш транспорт аймааның кирерин шуут хораанын сагындыраал.