Владислав Ховалыг август 26-да Чеди-Хөл кожуунга чорааш, социал болгаш коммунал инфраструктураның кол объектилериниң одалга сезонунга белеткелин хынап, ол ышкаш «Мелиорация» национал төлевилел күүселдези-биле катап тудуп эгелээн Элегестиң суггарылга системазынга четкен.
Республиканың Баштыңы «Элегес» суггат системазынга чораанын социал четкилерде бижээн. Шагда Элегест совхозтуң черлери турган ол черни 1983 чылда РСФСР-ниң Министрлер Чөвүлелиниң шиитпири-биле “Салчак Тока” аттыг совхоз деп эде адаан. Ажыл-агый суггаттыг шөлдерниң ачызында улуг сүт-бараан фермазын тудуп, республиканың найсылалын сүт-биле хандырып турган.
Асфальтылыг орук-биле Кызыл хоорайга чедир 1 шак хире халдыр болганындан, Элегес суурну болгаш бүдүн Чеди-Хөл кожуунну найысылал чоок-кавын долгандыр агро-куржаг тургузар девискээрлер составынче киирерин Тываның чазаа көрүп турар. Аңаа үндезин бар – Тываның деңнелинде эът болгаш сүт угланыышкынныг улуг арат ажыл-агыйлар чалаң сүт болбаазырадылгазын болгаш эът продукциязының бүдүрүлгезин шуудаткан.
Тус черниң көдээ ажыл-агый бүдүрүкчүлери совет үедеги бетон кыдыглыг, суг дуглап-ажыдар база өске-даа кезектерлиг, кагдынган суггат системазын катап тургузар дугайында саналды Тываның Баштыңынче киирген. Владислав Ховалыгның көдээ ажыл-агый шөлдерин ажыглалче хаара тударынче база суггат комплекстерин хөгжүдеринче угланган күрүне программазынче республиканы киирер дээн дилээ Россияның Президентизиниң деткимчезин алган.
Элегес системазын катап тургузарынче 32 хире млн. рубль салдынган, ооң чартыын Тываның чазаа үндүрген. 700 ажыг га дүжүткүр черни катап эргилдеже киирген. Сугнуң көстүп келгени тус черниң чер ажылдыгларынга хей-аътты берген – ажыл-агыйларын калбартып, тарылга шөлдерин улгаттырып, күштүг техника аймаан садып алыр арга тургустунган.
Республиканың Баштыңы бүгү Тывада суггарылга системаларын катап тургузар ажылды ам-даа уламчылаар сорулгалыг. Кааңдаашкынныг чылдар тус черниң байдалдарында суггат чокта, продукциялыг мал ажыл-агыйынга мал чеминиң четчир баазазын хандырары болдунмас дээрзин көргүскен. Элегес системазынга хамаарыштыр чугаалаар болза, суггаттыг шөлдерни 2 муң га чедир улгаттырар дээш арыктарны ам-даа хөгжүдер херек.