Тываның полициязы арага садып-саарар адырда кафелер болгаш барларга хыналдаларны күштелдирген. Август 27-де, Тываның Баштыңы-биле ужуражылга үезинде республиканың иштики херектер сайыды Юрий Завьялов ону чугаалаан. Владислав Ховалыгның социал четкилерде, сайыт «хоойлуга удур арага садып-саарылгазы-биле демиселге шыңгыы болгаш чиге турушту» ээлээнин дыңнаткан.
«Республикада хоойлуга удур арага садып-саарылгазы-биле демиселдиң доктаамал рейдилерин организастаар дээн Юрий Васильевичиниң эгелээшкинин деткип тур мен. Сайыттың бо айтырыгга хамаарыштыр шыңгыы болгаш быжыг туружун долузу-биле үлежир мен. «Кафе-барлар» деп боттарын чарлаза-даа, херек кырында хоойлуга удур арага садып турар албан черлеринче онза кичээнгейни угландырар апаар. Күрүнениң автоинспекциязының талазындан орук шимчээшкин дүрүмнериниң үрекчилеринге, ылаңгыя хамаатыларның амы-тынынга болгаш кадыынга айыылды тургузуп турар машина мунар эргези чок болгаш эзирик чолаачыларга удур контрольду күштелдирер» - деп, Тываның Баштыңы ВКонтактыда бодунуң арнында бижээн. Чоннуң "кудуп бээр" деп адап алганы кафелер болгаш барларга ол хамааржыр. Ол дээрге хөй-ниити черлери деп адаттынып алгаш, регион эрге-чагыргазының тургусканы арага садарының кызыгаарлаашкыннарын хажыдып, пиво, вино болгаш дыңзыг суксуннар садып турар садыглар-дыр.
«Кады күжениишкиннеривисти каттыштыргаш, эки үре-түңнелдерни чедип алырывыска бүзүрээр мен» – деп, Владислав Ховалыг Юрий Завьялов-биле чугаазын түңнээн.