Регионалдыг диспетчер албанының дыңнатканы болза, август 27-ниң эртенги шагында республика девискээринде Чөөн-Хемчик кожууннуң Чыраа-Бажы арга-арыг участогунда 37 га шөлдүг 1 өрт хып турган. 51 гада 1 өрттү чавырылдырган, 95 гада 2 өрттү эрткен хүнде өжүрген. Хову өрттери демдеглеттинмээн.
Өрт өжүреринде 149 кижи база 10 техника аймаа хаара туттунган. Тыва Республиканың Арга-арыг яамызының курлавырында 215 кижи база 124 санныг техника бар. Красноярск край, Омск база Иркутск областар, Бурят, Хакас республикалардан, Приволжьеден Авиа арга-арыг камгалалының өртчүлери Тывада ажылдап турар.
Федералдыг болгаш регионалдыг күштерниң демниг ажылының ачызында, арга-арыгларда өрттер чавырылганын Тываның арга-арыг сайыды Григорий Ондар демдеглээн. Ооң-биле чергелештир регионнуң арга-арыгларынга өртке удур айыыл чок чорукту хандырары-биле, хамаатыларның база транспорт аймааның арга-арыгже кирерин хораан онза чурум сентябрь 8-ке чедир күштүг болуп арткан.
2025 чылдың өрт айыылының үези эгелээнден бээр 18039 га ниити шөлге 172 арга-арыг өрттери бүрүткеттинген, ооң иштинде арга-арыг фондузунда – 169, онза хайгааралдыг бойдус девискээрлериниң («Азас» КБЗ) черлеринге 4 га ниити шөлдүг 3 өрт.