«Аныяктар болгаш уруглар» национал төлевилелдиң «Профессионалитет» федералдыг төлевилел боттандырылгазы-биле Кызылда Тудуг техникумунда улуг септелге ажылдары чоруп турар. Чаа өөредилге чылында техникумнуң «Профессионалитет» федералдыг программа-биле тудуг кластериниң өөредилге-бүдүрүлге төвү ажыттынар.
Өөредилге чери күш-ажыл негелделеринге дүүшкен ажылчын зонаны тургузуп, амгы үениң дериг-херексеелдерин садып алырынга 100 миллион рубльдиң грант акшазын алган. Демир дуңзаалаар өөредилге-бүдүрүлге комплекизи, чурталаг-коммунал ажыл-агыйының автоматчыткан системаларын хандырар шөл база тудуг объектилериниң информастыг тургузуунга техниктиг үделге лабораториязы – чаа объектилер санында.
Республиканың баштыңы Владислав Ховалыг тудуг объектизин хынап чорааш, ажылды дүрген доозары база ооң шынарын контрольдаары чугула дээрзин демдеглээн. "Ажылдарны дарый доозар база шынарга контрольду шыңгыырадыр даалганы бердим. Бистиң аныяктарывыс төлептиг байдалдарда херек мергежилдерни шиңгээдип өөренир ужурлуг" – деп, ол демдеглээн.
«Профессионалитет» федералдыг төлевилел Тывада 2023 чылда эгелээн. Бо өөредилге чылының эгезинде республикада ийи техникумнуң баазазынга – Тываның агроүлетпүр техникумунга база Ак-Довурактың даг техникумунга тудуг болгаш даг кластериниң өөредилге программаларын ажыдары планнаттынган.