Тываның Баштыңы Владислав Ховалыг анаа дайынчы Владимир Шарый-оолдуң («17») база улуг лейтенант Максим Голубковтуң («Вега») дайзынның Белгород облазының кызыгаарын эртерин кызыдып турган хүннеринде дайынчы даалгаларны күүседип тургаш көргүскени маадырлыг чоруунуң дугайында бодунуң блогунда бижээн.
Анаа дайынчы Владимир Шарый-оол команданы дүжүрүпкен соонда-ла, маадырлыг чоруун көргүскен. Ооң бронетехниказы даалгадан чанып кел чыда, артиллерия адыышкынындан база дроннар халдаашкынындан узуткаттынган. Ынчалза-даа ол тулчуушкун шөлүн кагбаан. «Владимир дайын шөлүнде балыгланган эштеринге бирги дузаны көргүзүп, оларны өскээр көжүрериниң хөделишкинин чоруткан. Ооң-биле чергелештир холунда чепсээ-биле эштерин камгалаан» - деп, республиканың Баштыңы чугаалаан.
Улуг лейтенант Максим Голубков командири чорупкан соонда, халдаашкын взводун удуртуп, дайзынның огунуң адаанга 54 хонук дургузунда бөлүктү чедиишкинниг удурткан. Ол боду дайынчыларның хөделиишкиннерин дүүштүрген.
Максимниң «чидириг чокка шупту чанып кээр кылдыр күштерни шын тургузуп, от болгаш дроннар адаанга канчаар дириг артарын кончуг таптыг тайылбырлап, өөреткен. Командири от адаанда туруштарын өскертип, камгалалды тудуп турган кижи бүрүзүнүң хей-аъдын деткип, кезээде чанынга чоруп турганын дайынчылар көрген» - деп, Владислав Ховалыг демдеглээн.
Ийи дайынчы эрес-дидимин болгаш бедик мергежилин бадыткаан. Тускай шериг операциязының үезинде олар хүлээлгезин хүндүткел болгаш чоргаарал-биле күүседип турар.