Тываның Барыын-Хемчик кожуунунуң Кызыл-Мажалык суурда 1000 олуттуг стадион тудуунда ажылдар кидин түлүк. Регионнуң баштыңы Владислав Ховалыг республиканың барыын кожууннарынче ээлчеглиг сургакчылаашкынга чорааш, тудугнуң кайы хире чоруп турары-биле танышкан. Тываның чазаа чоннуң киирген саналын деткип, келир үениң спортчу объектизин чурттакчыларның күжү-биле тудуп турар. График езугаар шупту ажылдар сентябрьда доостур ужурлуг.
"Республиканың эң улуг кожууннарының бирээзи – Барыын-Хемчик сентябрьда 100 чылдаан юбилейин демдеглеп эрттирер. Чурттакчыларга белек кылдыр Кызыл-Мажалык суурда 100 олуттуг улуг стадионнуң тудуун эгеледивис" – деп Тываның Баштыңы бодунуң арынында бижээш, чон спорт-биле өнңүктежир кылдыр кылымал шөлдүг бут бөмбүүнүң шөлүн база маңнаар кокпаларны чадарын, а кожуунга бедик деңнелдиг спортчу болгаш культурлуг хемчеглерни эрттирер спортчу объектини тудуп турарын тайылбырлаан.
Келир үениң стадион тудуу 40 хуу доозулган, чер ажылын «Восток» КХН кылган. 2024 чылда алганы 60×34 метр хемчээлдиг кылымал футбол шөлүн чаткан, Тываның Спорт яамызы кожуунга ындыг немелде шөлдү ам база бээр. 1000 олуттуг трибунаны, ГТО-га белеткенир тудуг демирлерин болгаш спортчу шөлдерни эптеп турар, келир үениң стадионунуң девискээрин херимнеп эгелээн.
База ол ышкаш Тываның Баштыңы кожууннуң удуртулгазы болгаш хөй-ниитичилери-биле Кызыл-Мажалыкка ужурашкаш, кожуун девискээрин хөгжүдериниң болгаш чурттакчы чоннуң амыдырал-чуртталгазының шынарын бедидериниң амгы айтырыгларын чугаалашкан. Шекпээр суурнуң школазынга көдээ ажыл-агый угланыышкынныг тускай класстарны ажыдары – чаа эгелээшкиннерниң бирээзи болган. Ынчалдыр уругларга көдээ ажыл-агый талазы-биле ханы билиглерни болгаш практиктиг арга-дуржулгаларны бээри көрдүнген. Бо өөредилге чылында тускай угланыышкынныг класстар база ажыттынар. Тываның Баштыңы эгелээшкинни деткип, Барун-Хемчик кожуун чер болгаш мал ажылы-биле кажан-даа алдаржып чораанын, ук адырны моон-даа соңгаар хөгжүдерин, келир үениң специалистеринге байдалдарны тургузарын ол демдеглээн.
Республиканың эң улуг кожууннарының бирээзиниң чүс чылдаанынга уткуштур, амыдыралдың аңгы-аңгы адырларын хаара туткан байырлыг хемчеглерниң улуг даңзызын январьда-ла ажылдап кылган. Кожууннуң чурттакчылары «Чүс буянныг үүле» деп акцияга идепкейлиг каттыжып, төрээн суурларының чаагайжыдылгазынга бүгү-ле дузаны чедирип болур. Чижээлээрге, Барыын-Хемчиктиң аныяктары хоочуннарга дузалап, девискээрлерни чаагайжыдып, ногаажыдып турар.
Сентябрьда юбилейлиг байырлалдың эң кол хемчеглери: шыдыраа база волейбол, тыва хүреш, тыва ча адары, 21,2 км-ге чартык марафон база аът чарыжының маргылдаалары болуп эртер.