Роспотребнадзор эргелелиниң Тыва Республика талазы-биле эргелели регионнуң школаларының чаа өөредилге чылынга белеткелин дыңнаткан. "Мурнунда илереткенивис хажыдыышкыннарны чайладыр дээн шупту айтыышкыннар бүрүнү-биле күүсеттингенин дыңнадып тур бис. Ылаңгыя школа столоваяларының, өөредилге черлериниң аъш-чем хандырылга цехтериниң беленин, оларны технологтуг болгаш соодукчу дериг-херекселдер-биле дерээнин, менюларны тургусканын хынаан " - деп, эргелелдиң удуртукчузу Людмила Салчак чугаалаан.
Бо өөредилге чылында ажыглалче кирер чаа школаларда суг хандырылга четкизин дезинфекциялаан соонда, суун база катап хынаан.
База ол ышкаш Россияның кол санитарлыг эмчизиниң доктаалын күүседири-биле ОРВИ, грипп база чаа коронавирус халдавырының эпидемиялыг сезонунга белеткенип, сезоннуг гриппке удур тарылгаларны чорудуп турар. Тарыышкын графигин бадылаан, бригадалар чаштарны, иштиг херээженнерни, өөредилге, эмнелге болгаш социал албан черлериниң ажылдакчыларын үезинде тарыыр. Чоннуң эвээш дизе 60 хуузу база айыылдыг бөлүктерде кижилерниң 75 хуузу тарылганы алыр ужурлуг.
«Бо чылын уруглар, социал ачы-дуза алыкчылары-биле ажылдап турар өөредилге, социал организацияларның, эмнелге албан черлериниң шупту ажылдакчыларының ат-сывын адааш, тарылгаже хаара тудуп, коллективтерже халдавырның нептерээрин эвээжедирин хайгаараар бис» - деп, Людмила Салчак чугаалаан.
Уруглар ортузунга респираторлуг вирус аарыгларының сезоннуг өзүлдезин болдурбазы-биле өөредилге черлеринге сентябрь 1-ден эгелеп аарыг кижилерни дарый илередир сорулгалыг эртенги хыналдаларны албан чорудар. Дезинфекциялаар бүдүмелдерни ажыглап тургаш, улуг арыглаашкынны чорударын, өрээлдер иштиниң агаарын арыглаар дериг-херекселдерниң барын база халдавырга удур эмнерни удуртукчу хандырар ужурлуг. Уругларның болгаш ажылдакчыларның айыыл чок чоруун хандырарынга профилактиктиг хемчеглер - чугула базым.