Дүүн Кызыл кожууннуң Элегес-Аксы суур девискээринге суггур чаъс соонда, федералдыг Р-257 «Енисей» автомобиль оруунуң кезээнге дагдан сай-довурактыг малгаштыг суг агып баткан.
Баш бурунгаар дыңнадыгдан алырга, ол улуг оруктуң 830-и километринге болган. Сай-довуракка алыскан участоктуң узуну 100 хире метр.
Оперативтиг бөлүк онза байдалдың уржуктарын чайладып, аңаа ажылдаан.
Тыва Республиканың орук-транспорт комплекизиниң сайыды Шораан Чыргал-оолдуң чугаазы-биле алырга, Кызыл кожуунну хайгаараар 8-ки өрт-камгалал кезээниң, ТР-ниң хамааты камгалал база онза байдал албанының (6 кижи база 2 техника), КАИ (2 кижи база 1 техника), ТР-ниң орук-транспорт яамызының (6 кижи база грейдер, орук аштаар шетка база экскаватор) күштерин база дериг-херекселдерин хаара туткан.
Оруктуң кырыкы кезээ үрелбээнин ажылчыннар дыңнаткан. Сай-довурактыг малгашты аштапкан соонда, транспорт аймааның аргыжылгазынга орук белен. Чоокку үеде ажылдарның шуптузун доозар.
Амгы үеде ол орук кезээнде шимчээшкин катап эгелээн. Орукту бүрүнү-биле аштаан.