Тываның командазы чурттакчыларының идепкейлиг бадылаанының түңнелинде, таарымчалыг хоорай хүрээлеңин тургузарының эң эки төлевилелдериниң бүгү-российжи мөөрейинге тиилээн. Бистиң республика 2026 чылда төлевилелдер боттандырыышкынче федералдыг деткимчени алыр. «Казань Экспо» делегей чергелиг делгелге төвүнге, Россияның Тудуг яамызының организастааны «Биче хоорайларны база төөгүлүг суурларны хөгжүдери» Х бүгү-российжи шуулганда тиилекчилерни чарлаан езулал соонда, Тываның Баштыңы Владислав Ховалыг бодунуң блогунда ооң дугайында дыңнаткан.
«Бистиң Национал парыгывыс база Бии-Хем кожуун 2026 чылда боттарының төлевилелдерин боттандырарынга федералдыг деткимчени алыр – деп, Тываның Баштыңы дыңнадып, байырын чедирген. - Тиилекчилерге байыр чедирип тур мен! Чаңгыс чер чурттугларывыска таарымчалыг байдалдарны тургузар дээш, бүгү-ле күжениишкиннерни салыр бис».
Бии-Хем кожууннуң Туран хоорайда «Тываже эжик. Комсомольская кудумчузу – Пятак – Автовокзалды хөгжүдериниң болгаш чаагайжыдарының концепциязы» деп төлевилел мөөрейге тиилээннерниң бирээзи. Кожуун таарымчалыг хоорай хүрээлелин тургузар эки төлевилелдерниң бүгү-российжи мөөрейинге үш дугаар тиилеп турары бо, ооң мурнунда Туранга көжүп келген баштайгы орус чоннуң парыгын база төпте Кочетов кудумчузун чаагайжыткан.
Бии-Хем кожууннуң чаа төлевилели хоорайже болгаш республикаже кирер черинде белдир черге эптиг болгаш сонуурганчыг девискээрни тургузар. 825 олуттуг чаа школа тудуу-биле кады кижилер кылаштаар черлерни чаагайжыдары - онза кичээнгейде.
Россияның Тудуг яамызы, Тыва Республиканың Чазаа, Тываның Тудуг яамызы, Федерация Чөвүлелиниң сенатору Шолбан Кужугет база Күрүне Думазының депутады Айдың Сарыглар эгелээшкинни боттандырарын деткээн. Дөзевилекчи Алдынай Байкара биле төөгүчү Татьяна Верещагина база чон ону деткээн. Бии-Хем кожууннуң чонунуң үзел-бодалы болгаш хөй-ниити санал-оналы төлевилел концепциязын хевирлээринге улуг ужур-дузалыг болган.
2025 чылда «Амыдыралга инфраструктура» национал төлевилелде «Таарымчалыг хоорай хүрээлеңин хевирлээри» федералдыг төлевилел боттаныышкыны-биле Тывада 33 хөй-ниити шөлдери чаартынар. Биче хоорайларга таарымчалыг хүрээлеңни тургузар талазы-биле бүгү-российжи мөөрейге тиилээн төлевилелдер: Чадаанада «9 кожуун төвү», Ак-Довуракта «Ак тоолчургу чугаа», Шагаан-Арыгда Дружба кудумчузунуң кижилер кылаштаар черин чаагайжыдары, Кызылда «Тыва кавай», Туранда хамааты дайынының маадыры Сергей Кочетов кудумчузун чаартыр объектилер улуг ужур-уткалыг.
Сөөлгү беш чылда федералдыг төлевилел ачызында, эрик кыдыы, дыштанылга зоналары, парктар, сесерликлер, кудумчулар болгаш спортчу шөлдер дээш, шупту 170 ажыг хөй-ниити шөлдери чаагайжыттынган.