Тываның чазаанга Владислав Ховалыгның удуртулгазы-биле регионнуң корум-чурум албан черлериниң, ол ышкаш Тываның Соңгулда комиссиязының, өөредилге болгаш туризм адырларының удуртукчулары киришкен республиканың террорга удур комиссиязының база оперативтиг штавының хуралы болуп эрткен.
Ужуражылгага чаа өөредилге чылын уткуштур хөй-ниитиниң болгаш террорга удур айыыл чок чоруунуң, ол ышкаш чоокшулап орар муниципалдыг соңгулдаларның айтырыгларын чугаалашкан.
Тываның Баштыңы Россияның ФАА база ИХЯ Тыва Республикада эргелелдериниң, Тываның Соңгулда комиссиязының, Росгвардияның ТР-де эргелелиниң, Россияның ОБЯ ТР-де КЭ, Тываның Өөредилге яамызы биле Кызыл мэриязының удуртукчуларының хүлээп алдынган хемчеглериниң дугайында информацияны дыңнаан.
Сентябрьның 14-те Чаңгыс аай бадылаашкын хүнүнде шупту соңгулда участоктарынга корум-чурумну полицияның дежурный ажылдакчылары хандырар. Соңгулдалар бүдүүзүнде, шупту соңгулда участоктарында ажылдакчылар өртке удур айыыл чок чоруктуң өөредилгезин албан эрттирер. Бо чылын соңгулда чорудуун 70 ажыг хөй-ниити хайгааракчылары хайгаараар. Чедери берге ыраккы суурларда соңгукчулар соңгулда эргелерин ажыглап, 2025 чылдың сентябрь 3-тен 9-ка чедир эрте бадылап болур.
2025 чылдың чазынында, Антитеррорчу айыыл чок чорук айының үезинде, Тывада өөредилге черлериниң айыыл чок чоруунга комплекстиг хыналданы чоруткан, аңаа өөредилге черлериниң 388 удуртукчулары болгаш 7240 башкы киришкен. Ооң түңнелинге даянып, чамдык байдалдарда хөделириниң чугула хемчеглерин ажылдап кылган.
Сентябрьның 1 бүдүүзүнде, айыыл-халапты болдурбазының хемчеглерин ажылдап кылыр бүгү-российжи өөредилгелерге Тыва база киржир. Тываның Баштыңы Өөредилге яамызынга хамааржыр объектилерниң паспорт алырын дүргедерин дааскан:
"Өөредилге албан черлери удуртукчуларының, ажылдакчыларның болгаш башкыларның киржилгези-биле террорчу айыыл-халап үезинде канчаар хөделиринге өөредиглерни эртер. Кижилерниң, ылаңгыя уругларның айыыл чок чоруу бирги чергениң айтырыы-дыр - деп, ол онзалап демдеглээн. - Тус чер бот-башкарылга органнары-биле өөредилге черлери кады айыыл чок чорук паспорттарын алыр дээш ажылды дүргедедирин Республиканың Өөредилге яамызынга дагзып тур мен».
Террорка удур комиссияның хуралынга Тываның девискээринде аалчылар бажыңнарының база аян-чорукчулар чыттырар черлерниң террорга удур камгалалын күштелдирер хемчеглерни база көрген. Оларның ээлери боттарының объектилеринге террорга удур айыыл чок чоруктуң хемчеглери дээш бүрүн харыылсалгалыг деп, Тываның Баштыңы айыткан. Хуралдың протокол шиитпири езугаар, өнчү ээлери объектилериниң айыыл чок чоруунга хамааржыр федералдыг хоойлужудулганың негелделерин октябрьның 1-ге чедир күүседир ужурлуг.