Тываның Баштыңы Владислав Ховалыг республиканың барыын кожууннарынче ажыл-агыйжы сургакчылаашкын үезинде Чадаана хоорайга четкен. «Өөредилге» национал төлевилел күүселдезинде эгелээш, «Аныяктар болгаш уруглар» деп чаа национал төлевилел-биле ажыглалче киирер чаа школаның кайы хире беленин хынаан. Өөредилге чери чаа өөредилге чылында өөреникчилерни хүлээп эгелээринге белеткенип турар.
Владислав Ховалыг Чадаанага келгеш, баштай Чөөн-Хемчик кожууннуң активи-биле ужурашкан. Муниципалдыг тургузугнуң көдээ ажыл-агый, өөредилге, инфраструктура, социал адырының айтырыгларын ужуражылга үезинде сайгарып чугаалашкан. Республика Баштыңы кожууннуң хөгжүлдезинче чурттакчыларның боттарын идепкейлиг хаара тударынче кичээнгейни угландырып, чедиишкин оларның эгелээшкининден база чаа идеяларны саналдаарынга беленинден хамааржыр дээрзин онзалап айыткан.
Регионнуң Баштыңы ужуражылга соонда 616 олуттуг чаа школа тудуунга барып четкен. Каш хонук болгаш ажыттынар объект бүгү Чөөн-Хемчик кожууннуң уругларынга амгы үениң өөредилге төвү апаар.
«Чаа школаның ажыдыышкынын чон четтикпейн манап турар, ол ам хоорайның чараш чери болгаш уруглар болгаш аныяктар чыглыр төп апаар. Школа уругларны хүлээп алырынга барык-ла беленин көрдүм: тудуг ажылдары доозулган, хайгаарал органнарындан чөпшээрел документилери алыр ажылдар чоруп турар» - деп, Владислав Ховалыг хыналда соонда бодунуң блогунда бижээн.
Өөредилге яамызы кожуун чагыргазы-биле кады өөредилге албан черин башкы кадрлар болгаш техниктиг ажылчыннар-биле четчелээр.
Школаны кезээш, ажылдың шынарын хынап көргеш, шупту эки болгаш чараш кылдынганын Владислав Ховалыг демдеглээн.
«Чаа эт-сеп болгаш амгы үениң дериг-херектери шупту чогуур черлеринде тургулапкан. Школаның улуг хурал залы чаражы болгаш таарымчалыы-биле концерт залдарын ажып турар кайгамчык. Улуг маргылдаалар-даа эрттирип болур ийи спорт залдыг база стадионнуг. Ам уругларны быжыг билиглер-биле чепсеглээри арткан» - деп, ол бодалы-биле үлешкен.
Республика баштыңы кожууннуң активи-биле ужурашкаш, Чадаана чаартып хөгжүп турарындан ам-даа хөйнү кылыр апаарын чугаалаан. Ооң бодалы-биле алырга, Чөөн-Хемчикке мал ажылын база малдан продукция бүдүрүлгезин ам-даа улам хөгжүдери чугула.
Бо чылын Чөөн-Хемчик кожуун азы Даа кожуун тургустунганындан бээр 260 чылын демдеглеп турар. Ол хүнге тураскаадып кожуунга августуң 22-ден 30-ге чедир байырлал хемчеглери болур. Республиканың бурун болгаш улуг муниципалдыг тургузугларның бирээзинге чаа школаны ажыдары - ооң юбилейинге канчаар-даа аажок улуг белек.