Тываның Баштыңы Улуг-Хем кожуунга сургакчылаашканга чорааш, Чодураа суурда школа, культура бажыңы, фельдшер-акушер пунктузунуң тудуун, Торгалыг суурда школаның капиталдыг септелгезин хынап көрген. Ол чорааш, Владислав Ховалыг чаа школаның башкылар коллективи-биле ужуражып, Торгалыгда объектилерниң тудугжулары-биле чугааны чоруткан. Суурларның чурттакчылары чугула социал албан черлерин туттуруп турары дээш четтиргенин илередип, суурларның инфраструктуразын моон-даа соңгаар экижидеринге санал-оналдарын киирген.
Улуг-Хем кожууннуң Чодураа суурда 176 олуттуг болгаш спорт залдыг школа тудуу «Көдээ девискээрлерниң комплекстиг хөгжүлдези» күрүне программазы-биле чоруп турар. Амгы үеде объектиниң белени 90 хуу ашкан. Бо хонуктарда харылзаа системаларын, видеохайгааралды, сигнализацияны болгаш өске-даа чүүлдерни эптеп салыптар. Чаа өөредилге чылының ажыдыышкынынга чедир школа девискээрин чаагайжыдып доозар. Суурнуң төп кудумчузунда школаже баар орукту база бо чайын септээн.
Школаның коллективи болгаш суурнуң идепкейжилери-биле ужуражылга чаа школаның улуг залынга болуп эрткен. Чаа эт-сеп, аъш-чем кылыр техника аймаа, инженер-техниктиг четкилеринге чедир шупту дериг-херекселдер амгы үениң негелделеринге дүгжүп турар. Өөредилге чериниң ажылдакчылары чаа дериг-херексел-биле ажылдаарынга өөредилгени эрткенин школаның удуртулгазы дыңнаткан.
"Эрги школага ажылдаан хоочун башкылар чаа оран-савага ажылдаар аргалыг болганын демдеглеп, амгы үениң байдалдарында уругларга өөредилгениң шынарын бедидер дээш бүгү-ле күжениишкинни үндүреринге беленин дыңнаттылар. Чодураа школазының тудуу доосту бээрге, "Көдээ суурнуң комплекстиг хөгжүлдези" күрүне программазынга киржир чаа аргалар база бар" – деп, Владислав Ховалыг хыналда соонда бодунуң блогунда демдеглээн.
Торгалыг суурда көдээ культура бажыңының тудуу «Сорунза» губернатор төлевилели-биле чоруп турар. Республика бюджединиң акша-хөреңгизи-биле саткан материалдарны ажыглап, кожуун чагыргазы болгаш суму чагыргазы культура бажыңын боттары тудуп алыры – төлевилелдиң сорулгазы. Культура бажыңнары чок суурларда төлевилел боттандырылгазы, ыраккы көдээ суурларның чурттакчыларын хөйү-биле культура-массалыг хемчеглерже хаара тудар ужурлуг.
Суурнуң чагыргазы тудугну чоннуң күжү-биле органиазстаан. Эки турачы тудугжулар бригадазы келир үениң клувунуң таваан кудуп, чагыларын быжыглаан. Бо үеде ханаларын база баартыктарын салыр ажылдар чоруп турар.
Владислав Ховалыг клуб тудуунда тудугжуларның идепкейин демдеглеп, аңаа библиотека база турарын дыңнаткан.
Торгалыгда культура бажыңындан аңгыда, «Идепкейжи узун назын» национал төлевилелдиң кадык камгалалының баштайгы эмчи дузазын эде чаартыр программазы-биле, Торгалыгда чаа эмнелге амбулаториязын тудуп турар. Владислав Ховалыг ажылдарның шынарын хынап, объектилерниң тудугжулары-биле чугаалашкан.
"Суурга чаа школа тудар айтырыг-биле база ажылдап турар бис. Амгы үеде Торгалыг суурнуң өөреникчилеринге тускайлаан оран-савада капиталдыг септелге ажылдары доозулган. Орукту септээриниң айтырыын база шиитпирлээр бис" - деп, республика баштыңы сургакчылаашкын соонда бодунуң блогунда дыңнаткан.