Республикада черлик конопляга удур улуг хемчээлдиг акция чоруп турар. Чылдың-на ол ажылды республиканың күрүнениң арагага болгаш наркотиктерге удур программазының шугуму-биле чорудуп турар.
Республиканың Баштыңы Владислав Ховалыг бодунуң блогунда байдалды доктаамал контрольга тудары чугула деп демдеглээн. «Республиканың Көдээ ажыл-агый болгаш аъш-чем яамызынга черлик конопля үнген черлери илередип, ооң тарап нептерээрин болдурбас хемчеглерни үе-шаанда алыр даалганы бердим. Бистиң ниити сорулгавыс – ол черлерни көдээ ажыл-агый ажыглалынче киирерин калбартыр» - деп, ол демдеглээн.
Республиканың Көдээ ажыл-агый яамызының дыңнатканы-биле алырга, бо хүнге чедир 1,4 муң гектар черде чыдыг чашпанны узуткаан. Чыдыг чашпанга удур хоранны чаштырары түңнелдиг болурун арга-дуржулга көргүскен. Акция үезинде, Бай-Тайга, Барыын-Хемчик, Чөөн-Хемчик, Каа-Хем, Кызыл, Бии-Хем, Таңды, Тес-Хем, Улуг-Хем, Чаа-Хөл болгаш Чеди-Хөл кожууннар девискээрлеринде чыдыг чашпан үнген шөлдерге 2300 ажыг литр гербицидти чаштырган.
Баш бурунгаар санааны болза, республикада ниитизи 2654 га шөлдерде конопля бар дээн болза, 1,8 муң ажыг га шөлде ол үнүп тараан болган. Муниципалдыг тургузуглар чыдыг чашпанның тарап нептерээнин болдурбазы-биле 222 гектар черде бок үнүштү кескен. Оон аңгыда, чашпанның хөй үнген черлерин хол-биле кезип, чок кылып турар.
Ол шөлдерниң 180 гектарында көдээ ажыл-агый культураларын тарып, ажыглалче киирген.