Регионнуң диспетчер албанының дыңнатканы болза, август 22-ниң эртенинде, республика девискээринде 424 га шөлде 8 арга-арыг өрттери хып турар, 768 га шөлде 7 өрттер чавырылдырган, оларны шуут өжүрер ажылдар чоруп турар. Сөөлгү хүнде 871 га шөлге 4 өрттү өжүрген. Дүүн Таңды кожууннуң Хадың-Аксы суурдан мурнуу-чөөн чүкче 3 км черге чаңнык дүшкенинден ховуга үнген бир өрттү ол-ла хүн өжүрген.
Тываның арга-арыг сайыды Григорий Ондарның чугаазы-биле алырга, амгы үеде Каа-Хем болгаш Тес-Хем арга-арыг ажыл-агыйларында өрттерниң көвей кезиин өжүрген. Ооң-биле чергелештир Чадаана болгаш Шагаан-Арыг арга-арыг ажыл-агыйларында ниити 394 га черде хып турар 3-4 өрттү өжүрер ажылдар уламчылавышаан.
Өрттер өжүреринде 401 кижи база 29 техника киржип турар. Тыва Республиканың Арга-арыг яамызының курлавырында 177 кижи, 110 санныг техника бар. Республикада арга-арыг өрттерин өжүреринге дузаны чедирери-биле «Авиалесоохрананың» Красноярск крайдан, Омск болгаш Иркутск областардан, Бурятия, Хакасия республикаларындан, ол ышкаш Поволжьеден келген ажылдакчылар ажылын уламчылап турар.
Тывада өрт айыылының нарын байдалы-биле хамаатыларның болгаш транспорт аймааның арга-арыгже кирерин хораан регионалдыг онза байдал чуруму сентябрь 8-ке уламчылап турарын сагындыраал.
2025 чылдың өрт сезону ажыттынганындан бээр күрүнениң арга-арыг инспекторлары арга-арыг фондузунуң черлеринге арга-арыг өрттеринге удур 1963 хайгааралды чоруткан. Россия Федерациязының Административтиг чурум үрээшкиннериниң дугайында хоойлунуң 8.32 чүүлү-биле 33 административтиг херекти оттурган. Россияның Онза байдалдар яамызының ТР-де кол эргелелиниң хайгаарал ажыл-чорудулгазы болгаш профилактиктиг ажыл талазы-биле эргелелиниң девискээр кезээ иштики херектер органнарынче арга-арыг өрттеринге буруулуг кижилерни илередир дээн 166 билдириишкинни киирген. Амгы үеде ол факт-барымдааларга хамарыштыр истелге чоруп турар.