Регионнуң чазаанга Тываның Баштыңы Владислав Ховалыг биле «Россети Сибирь» компанияның чиңгине директору Антон Дьячковтуң аразында ажылчын ужуражылга болуп эрткен. Республиканың чырык хандырылгазын экижидер, электри четкизиниң комплекизин эде чаартыр болгаш хөгжүдер планнарны олар чугаалашкан.
Энергетика хандырылгазынга болгаш чугула инфраструктура төлевилелдерин боттандырарынга «Россети Сибирь» ПАН кол рольду ойнап турарын барымдаалап, амгы үеде кол системаның территориалдыг четки организациязы болур энергетика компаниязының чиңгине директорунуң келгени улуг ужур-дузалыг дээрзин Владислав Ховалыг демдеглээн.
Республика бодунуң талазындан энергетика айтырыгларын шиитпирлээри-биле улуг күжениишкиннерни үндүрүп турар. Эрткен чылын Кызыл хоорайны долгандыр коммерцияга хамаарышпас садчылар эштежилгелериниң (СНТ) четкилерин «Россети Сибирь Тываэнерго» компанияже шилчидериниң мурнунда, соңгаарладып болбас ажылдарже регион бюджединден 23 млн. рубльди тускайлаан.
Антон Дьячков Тывага кээп чорааш, «Россети Сибирь Тываэнерго» компанияның элээн каш объектилеринге чедип, оларның материал-техниктиг байдалын, электри четкилеринде септелге ажылдарын база күскү-кышкы үеге белеткелди хынаан, ол ышкаш коллектив-биле ужурашкан.
Чиңгине директор хандырылга болгаш септелге программазының күүселдезин республика Баштыңынга тодаргай чугаалаан. 2025 чылдың бирги чартыында планнаттынган ажылдар долузу-биле доозулган: аңгы-аңгы күчүлүг 230 хире км электри шугумнарын (ПТЛ) септеп, эргижирээн чырык удазыннарын солуп, чырык шугумунуң камгалал зоналарын арыглап, кожууннарда элээн каш подстанцияларны болгаш трансформаторларны чаарткан.
Улуг чүъктүг кышкы үеде үзүктел чок ажылдаарынга күскү-кышкы үеге белеткенип тургаш, четкилерни үезинде септеп, чаартыры чугула дээрзин ийи тала демдеглээн.
Хууда хереглекчилерның чырыктан чылыгны алырынче шилчиирин база чугаалашкан. «Арыг агаар» федералдыг программа-биле агаарның хирленгенин эвээжедир хемчеглерни боттандырып турар 29 хоорайларның даңзызынче Кызыл база киргенин республика Баштыңы дыңнаткан. Хууда бажың ээлери электрилиг чылыдылгаже шилчиир программа хемчеглериниң даңзызында кирген.
Регионнуң баштыңы национал төлевилелдер күүселдези-биле туттунган объектилерни чырык-биле хандырар дээн энергетиктерниң үре-түңнелдиг ажылын, чугула социал объектилерниң: чаа школаларның, кадык камгалал албан черлериниң болгаш амыдырал-хандырылга объектилерниң технологтуг кожулдазынга хамаарыштыр хүлээлгелерни күүсеткенин демдеглээн. Энергетика компаниязының деткимчезинде Тыва Республикада үлетпүр болгаш социал адырларда инвестиция төлевилелдерин электри энергиязы-биле хандырар комплекстиг план чедиишкинниг боттанып турар. Энергетиктерниң күжениишкиннери-биле планның кол объектилери бо чылын ажыглалче кирип эгелээн.
Антон Дьячков учет чокка энергия ажыглалын тодарадыр дээн энергетиктерниң улуг ажылын дыңнаткан. «Россети Сибирь Тываэнерго» компанияның специалистериниң доктаамал рейдилериниң ачызында, республикада хуу кижилер ортузунга төлевир чуруму экижээн, ол амгы үеде 90 хуу четкен.
Ужуражылганың киржикчилери онза кичээнгей негеттинер айтырыгларны база көрген. 2025 чылдың январь 1-ден эгелеп «Россети Сибирь Тываэнерго» компанияга территориалдыг четки организациязының статузун тыпсып бергени-биле компанияның баланзынче 1700 ажыг энергетика объектилерин, ооң иштинде ээзи чок деп санаан объектилерни шилчиткен. Баш бурунгаар санаашкыннардан алырга, октаттынган четкилерни чогуур байдалче кииреринге 870 ажыг млн. рубль херек. Бо айтырыг тодаргай шиитпирлерни ажылдап кылырын негеп турар деп түңнелге ийи тала келген. Бирээде, эде тудар болгаш чаартыр энергетика объектилериниң даңзызын бирги ээлчегде тургузар. Ол ажылдар чоокку чылдарда Тываның электри четки ажыл-агыйын хөгжүдер программаның өзээ апаар.
Ол-ла ужуражылгада 2027 чылдан бээр боттандырары планнаттынган таарыштырылга дугуржулгазының пунктуларын база сайгарган.
Антон Дьячков «Россети Сибирь» ПАН-ның чиңгине директору, баштаар чериниң даргазы кылдыр Тыва Республикага бир дугаар келген, ол ук албан-дужаалга бо чылдың апрельде томуйлаткан
.