Тываның Баштыңы Владислав Ховалыг ажыл-агыйжы сургакчылаашкын үезинде, Улуг-Хем кожуунда «Аныяктар болгаш уруглар», «Өг-бүле», «Амыдыралга инфраструктура» национал төлевилелдерниң база «Көдээ суурнуң комплекстиг хөгжүлдези» күрүне программазының деткимчези-биле тудуп база чаартынып турар элээн каш социал объектилерге четкен. Республиканың удуртукчузу ол-ла чорааш, кожууннуң удуртулгазы болгаш чурттакчылары-биле база ужурашкан.
Владислав Ховалыг Улуг-Хем кожууннуң төвү Шагаан-Арыг хоорайда 1 дугаар школаның капитал септелгезин база 150 олуттуг уругларның уран чүүл школазының тудуунга четкен.
Шагаан-Арыг хоорайның 1 дугаар школазының капитал септелгези «Көдээ черлерниң комплекстиг хөгжүлдези» күрүне программазының «Көдээ суурларның амгы аян-хевири» программа күүселдези-биле чоруп турар. «– Өөредилге чылының төнчүзүнде Өлчей» КХН тудуг ажылынче кирген, эрги шывыгларны адырып, шаланы тырттып, бетоннап, даштын шеверлеп, чаа соңгаларны салган. Амгы үеде канализацияны тургузуп, ханаларын дескилеп, чырык удазынарын солуп, кырын кылып турар.
Шагаан-Арыг хоорайның 150 уругга уран чүүл школазының капитал септелгези база-ла «Көдээ черлерниң комплекстиг хөгжүлдези» күрүне программазының «Көдээ суурларның амгы аян-хевири» программазы-биле чоруп турар. Хоорайның төвүнде октаттынган тудугда ону кылып эгелээн. Хуу сайгарлыкчы О.К. Аракчааның тудуг чери шөлдү арыглап аштааш, чазар, сөгер ажылдарны кылып, таваан чылыглап, өрээлдерин эде планнаан. Тудугжулар амге үеде кырын дуглап, таваан кудуп, бетоннааш, чамдык черлеринде тууйбуларны салган.
«Шагаан-Арыгның 1 дугаар школазында муң ажыг уруг өөренип турар. «Көдээ черлерниң комплекстиг хөгжүлдези» федералдыг программаның «Көдээ суурларның амгы аян-хевири» программазы-биле улуг оран-савада ажылдар апрельде эгелээн. Ажылдың хемчээли улуг-даа болза, график езугаар чоруп, чыл төнчүзүнге чедир доозуптар ужурлуг. Өөреникчилерни хоорайның өске школаларынче түр када хуваай чоруткан болгаш, өөредилге уламчылаар. Ол ышкаш 150 олуттуг чаа хөгжүм школазының тудуг шөлдерин база көрдүм. 1 дугаар школаның дужунда ону туттунуп турар. Объектиде ажылдарны көдээ девискээрлерниң комплекстиг хөгжүлде программа-биле боттандырар. Хоорай уругларынга өөрениринге, талантызын ажыдырынга база салым-чаяанын сайзырадырынга амгы үениң байдалы тургустунар» - деп, Тываның Баштыңы хыналда соонда бодунуң блогунда бижээн.
Ол ышкаш Владислав Ховалыг ниити өөредилге школазы биле уругларның уран чүүл школазы турар Октябрьская кудумчузун чаагайжыдар төлевилелди белеткээр даалганы кожууннуң удуртулгазынга берген. Регионнуң баштыңының бодалы-биле алырга, орукту асфальтылааш, кижи кылаштаар черлерни кылып, ногаан булыңнарны тарып олурткаш, хоорайның аян-хевирин амгы үениң негелделеринге дүүштүр, чурттакчыларга таарымчалыг кылдыр кылып ап болур.
Владислав Ховалыг кожууннуң активи-биле ужуражып тура, чоннуң амыдырал-чуртталгазының шынарын экижидеринге угланган республикада боттандырып турар төлевилелдерниң дугайында чугаалаан.
"Чурттакчылар боттарының хоорайының болгаш кожууннуң хөгжүлдезинге идепкейлиг киржир күзелдиг болуру чугула. Арага-дары-биле хоойлуга удур садыглажыышкынны чок кылыр дээш, кады ажылдаарын дугуруштувус" - деп, Баштың бодунуң блогунда демдеглээн.
Владислав Ховалыг социал объектилерге чедип, чурттакчылар-биле ужурашкан соонда, ажылдарның шынарынга база объектилерни дужаар хуусааларынга, ол ышкаш улуг-хемчилерниң саналдаан эгелээшкиннерин боттандырарынга хамаарыштыр элээн каш даалгаларны берген.