Регионнуң иштики херектер яамызының чаа сайыды Юрий Завьяловтуң удуртулгазы-биле полиция ажылдакчылары болгаш Россияның национал гвардиязы эргелели республика найысылалынга дүнеки рейдини чоруткан. Корум-чурум камгалакчылары рейд үезинде, хоорайда садыг объектилериниң хоойлуга удур арага садыглаашкынын база хөй-ниити корум-чурумунуң байдалын хынаан. Республика Баштыңы Владислав Ховалыг 2022 чылдан эгелеп күш кирген республиканы кем-херек үүлгедиишкининден чайладыр талазы-биле ведомстволар аразының комплекстиг планы езугаар чоруп турар ИХЯ-ның чаа удуртукчузунуң идепкейлиг ажылын демдеглээн.
Тываның ИХЯ-зының чаа удуртукчузу Юрий Васильевич Завьялов бо ажылче идепкейлиг кирген. Бистиң чаңгыс чер-чурттугларывыс хөй-ниити корум-чурумун хандырар айтырыг талазы-биле чаңгыс эвес удаа дыңнадыгларны киирген. Хоойлуга чагыртпайн арага садып турар чорукка удур шыңгыы болгаш турум демиселди организастаар дээн Юрий Васильевичиниң эгелээшкинин бүрүнү-биле деткип тур мен» - деп, Владислав Ховалыг бодунуң блогунда ИХЯ оперативтиг ажылынга хамаарыштыр бижээн.
Республика Баштыңы корум-чурум камгалакчылары биле профилактика субъектилериниң кады ажылдажылгазы республиканың чурттакчыларының айыыл чок болгаш чаагай чоруунга көскү түңнелдерни эккээр дээрзинге бүзүрелин илереткен.
Тываның Чазааның регионнуң шупту эрге-хоойлу камгалаар албан черлериниң киржилгези-биле бадылаан ведомстволар аразының кем-херек үүлгедиишкиннерин эвээжедир талазы-биле комплекстиг планы 2022 чылдан эгелеп күш кирген. Регионда кем-херек үүлгедиишкиннериниң деңнелин эвээжедиринче угланган 60 ажыг хемчеглерни, ооң иштинде кем-херек үүлгедиишкиннеринге база корум-чурум үрээшкиннеринге удур хамаатыларга эрге-хоойлу өөредилгези болгаш юридиктиг медээлерни бээри, профилактика болгаш рейд хемчеглерин эрттирери, арага, наркотиктиг бүдүмелдерни болгаш албаарадыр бүдүмелдер ажыглаарын эвээжедири, назы четпээннерниң хайгаарал чок чоруурун база корум-чурум үрээшкиннерин болдурбас сорулга-биле немелде өөредилгени чорудары, коррупцияга удур демисел, кеземче херээниң хоойлужудулгазын хандырары дээш, оон-даа өске кезектер планче кирген.
Владислав Ховалыг иштики херектер сайыды Юрий Завьялов-биле бир дугаар ужуражып тура, планның чамдык угланыышкыннарын, ылавылаарга, арага продукциязын хоойлуга удур садып-саарары-биле демиселди күштелдирериниң дугайында чугаалашкан турган. Бо чылдың 6 айында регионда илереттинген 563 кем-херек үүлгедиишкиннериниң ниити санындан 25 хуузу азы 140-ү эзирик тургаш кылган аар болгаш онза аар кем-херек үүлгедиишкиннери болган. Июль ортанга чедир 311 кем-херекти, ооң иштинде 17 өлүрүүшкүннү, кадыкшылга өжегерээн аар уржук чедирген 98 херекти эзирик тургаш кылганы демдеглеттинген. Бо угланыышкынче улуг кичээнгейни салып, байдалды эдер дээш кады күжениишкиннерни киирерин ийи талазы ынчан дугурушкан.
Ведомстволарның каттышкан рейдизи - спирт холуксаалыг продукцияны хоойлуга удур садып-саарарынга дээштиг хемчег бооп турар. Тыва Республикада ажыл-чорудулганың чамдык хевирлеринге лизенция бээр албан биле корум-чурум камгалаар органнар кады чыл эгезинден бээр 705 рейдини эрттирген, полиция ажылдакчылары «Алкоголь», «Правопорядок», «Барьер», «Суррогат» оперативтиг хемчеглер үезинде арага садар хоойлужудулганы үрээн 169 таварылганы илереткен.
Рейдилер үезинде 11727 санныг, азы 11613 литр арага болгаш спирт холумактыг продукцияны хавырган.