Регионалдыг диспетчер албанының дыңнатканы болза, август 20-ниң эртенинде республиканың арга-арыг фондузунуң девискээринде ниитизи-биле 2300 га шөлде 23 өрт бар, ооң иштинде 1629 га шөлде 17 өрт хыппышаан, а 671 га шөлде 6 өрттерни өжүрген. Дүүн 95 га шөлде 4 өрттү өжүрген. Ооң-биле чергелештир дүүн 309 га шөлде чаа 5 арга-арыг өрттери үнген.
Тываның арга-арыг сайыды Григорий Ондарның дыңнатканы-биле алырга, чаа өрттер чаңнык дүшкенинден өөскээн. Каа-Хем кожууннуң Бүрен-Хемде дыштаныр хүнде хып турган өрт хову өртүнче шилчээн. Ында ийи черде хып чыдар. Амгы үеде Республиканың ХК база ОБ албаны хову шөлдерде хып турар өрттер чогун дыңнаткан.
9 кожуунда: Каа-Хемде (5), Таңдыда (1), Тес-Хемде (2), Тере-Хөлде (2), Улуг-Хемде (4), Чеди-Хөлде (3), Чөөн-Хемчикте (3), Өвүрде (2), Бай-Тайгада (1) арга-арыг өрттери-биле демисел чоруп турар.
506 кижи, 46 санныг техника өрт өжүрүлдезинде киржип турар. Арга-арыг болгаш бойдус яамызының курлавырында 104 кижи база 98 техника аймаа бар. Красноярск край, Омск база Иркутск областар, Бурят база Хакас республикалардан, Приволжьеден өртчүлер республикада өрттерни өжүржүп турар.
Тывада өрт айыылы улуг болганындан, хамаатыларны болгаш транспорт аймаан арга-арыгже кирерин хораан регионалдыг онза чурум сентябрь 9-ка чедир ажылдаарын сагындыраал.