Россияның регионнар баштыңнарының аразындан бир дугаарында Владислав Ховалыг российжи чаа мессенджер МАХ-ка бүрүткеткен. Ол бодунуң чаа каналының дугайында социал четкилерде чугаалап, чурттуң чаа платформазы элээн нептереңгей апарганын демдеглээн. Чаа мессенджер 2025 чылдың июльда национал эрге-байдалды алган, алызында ону Күрүне ачы-дузалары болгаш өске-даа күрүне сервистери-биле каттыштырар кылдыр планнаан.
"Аңаа бодумнуң каналымны ажылдадырын шиитпирледим. Ол бистиң республикавыстың хөгжүлдезиниң болгаш чаагайжыдылгазының талазы-биле ажылывысты чаңгыс чер-чурттугларывыска чугаалаар база бир онзагай шөл апаар" - деп, ВКонтакте социал четкиде арны база Telegram мессенджерде каналы бар Тываның Баштыңы чугаалаан.
Владислав Ховалыгның каналынга бижидип алырда, дараазында max.ru/khovalyg_live шөлүгже базар/ Тываның Баштыңы MAX-ка бүрүткедип алырга-ла, 800 хире кижи ооң каналынче бижидип алган.
Бо хүнде МАХ-та 18 хире миллион кижи бүрүткеткеш, ажыглап турар. Москва, Санкт-Петербург, Самара, Краснодар, Екатеринбург база Казаньның чурттакчылары эң идепкейлиг болуп, МАХ-че кирип турар. Бүрүткеткен кижилерниң 73 хуузу Android мобильдиг системаны, 26 хуузу — iOS база 1 хуузу — ПК-та хевирни ажыглап турарлар.
МАХ-ты ажылдадыптарга, ажыглакчылар 200 ажыг миллион смс-терни чорудуп, бөлүктээн видеочугаага 30 хире млн ужуражылганы кылган. Чугаалажылганың ортумак үези сес минута болган болза, а бөлүк аайы-биле чугаа 47,5 минута үргүлчүлээн. Ында бөлүктер чадының саны 700 муң ажа берген.
MAX — ажыглал ачы-дуза чедирилгезиниң российжи чурагайлыг шөлү болур. Ажыглакчыларга кол харылзаа аргаларын: аудио болгаш видео долгаашкыннарны, чаттарны, үннүг медээлерни, улуг файлдарны болгаш акша шилчидерин хандырган мессенджер шөлү болур. Шөл ажыглакчыларның хүн бүрүде айтырыгларын шиитпирлежип болур биче капсырылгалар болгаш чат-боттар хевирлиг онзагай бизнес-сервистерни каттыштырган.
Капсырылга Россияның программа хандырылгазының реестринче кирген. MAX-та бар шупту садыглар мобильдиг, десктоптуг болгаш веб-хевирлеринде капсырылгаларлыг.