Регионалдыг диспетчер албаны август 19-туң эртенинде республиканың арга-арыг фондузунуң девискээрлеринге 1376 га ниити шөлде 14 арга-арыг өрттери хып турганын, 621 га шөлде 8 өрттү өжүргенин дыңнаткан. Ооң мурнунда хүн 9,2 гада 3 арга-арыг өртүн өжүрген. Хову-шөлдерде чаңгыс-даа өрт бүрүткеттинмээн.
Тес-Хем болгаш Каа-Хем арга-арыг ажыл-агыйларында тус-тузунда 4 база 5 өрт хып турар, Каа-Хемде 3 өрттү өжүрген.
Элегес, Арыг-Үзүү, Хайыракан, Ак-Дуруг, Чадаана, Өвүр, Бай-Хаак, Хову-Аксы, Элегес арга-арыг участоктарында өрттер ам-даа бар.
Өрт өжүреринде 469 кижи база 43 техника хаара туттунган, ТР-ниң Арга-арыг яамызының курлавырында 90 кижи база 94 техника белен. Республикада арга-арыг өрттерин өжүржүр дээш, Красноярск край, Омск база Иркутск областар, Бурят Республика база Приволжьеде Авиаарга-арыг камгалал албанындан өртчүлер ажылдап турар. Дүүн Абаканда авиаарга-арыг камгалал кезээнден өртчүлер чедип келген.
Тывада өрт айыылының байдалы нарыыдааны-биле киирген регионалдыг онза байдал чуруму сентябрь 8-ке чедир күштүг.