Тывада грипп болгаш респираторлуг вирус халдавырынга удур коллективтиг иммунитетти тургузары-биле тарыышкынче чонну хөйү-биле хаара тудар кампания эгелээн. Ону чедип алыр дизе, республиканың чурттакчы чонунуң 60 хире хуузунга тарылганы кылыры чугула. Регионнуң Кадык камгалал яамызы 232641 доза вакцинаны садып алган.
Тарылганы мурнады салыр бөлүктеринге бичии уруглар, улуг назылыг кижилер база хоочураан аарыг кижилер хамааржыр. Бо хүнде республика гриппке удур тарылга чорудар баштайгы 61400 дозаны алган. Оларның 44530-ү уругларга болгаш иштиг херээженнерге тааржыр «Ультрикс-квадри» база 16870 «Совигрипп» биле «Флю-М» вакциналар болур. Эмнерни республиканың эмнелге албан черлеринче тарадыр үлээн.
Дараазында тарыышкын эмнери бо чылдың октябрь-ноябрьда кээр. Оон аңгыда республика чаа коронавирус халдавырының эпидемиологтуг байдалы нарыыдаар болза, аңаа удур вакциналарны садып алыр. Амдыызында Тывада COVID-19 байдалы ажырбас.
Сезоннуг грипптиң нептерээрин болдурбас кол арга – тарылга дээрзин сагындыраал. Специалистер арыг-силигни сагыырын сүмелеп турар: холдарны үргүлчү саваңнап чуур, гаджеттерни дезинфекциялыг чүүлдер-биле аштаар база хөй-ниити черлеринге камгалал маскаларны кедер. Ылаңгыя агаар өскерлип турар үелерде, эң-не “хээрек” кижилер – чаштар болгаш кадыы кошкак кижилерниң үеге таарыштыр кеттинири чугула.