Тываның культура яамызы Р.Д. Кенденбиль аттыг республиканың уран чүүл школа-интернады, уругларның уран чүүл школалары база А.Б. Чыргал-оол аттыг Кызылдың уран чүүл колледжизи чаа өөредилге чылынга беленин медеглээн. Одалга-энергетика комплекизиниң, чуртталга-коммунал ажыл-агыйының база социал адыр объектилериниң беленинге неделя санында мониторингини чорудуп турган регионалдыг одалга болгаш энергетика яамызы культура албан черлери кышка эки белеткенгенин айыткан. Республика Баштыңы Владислав Ховалыг культура объектилери кышка белеткелди шынарлыг чоруткаш, мурнакчылар санынче киргенин демдеглээн.
Муниципалдыг тургузугларда культура өөредилге албан черлери болгаш уругларның уран чүүл школалары чайгы дыштанылга үезинде агар септелге ажылдарын, тодаргайлаарга, иштики база даштыкы ажылдарны доозуп, чаа өөредилге чылынга белен. Оон аңгыда одалга системаларын белеткээн: системаларны чугдуруп, суг базыышкынын шенеп, өртке удур сигнализация шугумун септеп, террорга удур камгалалын (АТС) күштелдирген.
Р.Д. Кенденбиль аттыг республиканың уран чүүл школа-интернадын июньда септээн, амгы үеде өөредилге чериниң өрт медээлээр системазында улуг септелге ажылдары чоруп турар. Одалга сезонунга чугула ажылдар шупту кылдынган, албан чери белениниң паспортун алыр дээш чогуур документилерин дужааган. Школа-интернат чаа өөредилге чылында «Хөгжүм уран чүүлү», «Хореография уран чүүлү» база «Уран чурулга» салбырларынга өөренир 242 уругну хүлээп алырынга белен, оон аңгыда культура адырында немелде өөредилгеже Кызыл хоорайның өске өөредилге черлери уругларны хүлээр.
А.Б. Чыргал-оол аттыг Кызылдың уран чүүл колледжизи чаа өөредилге чылынга белеткенип турар: өөредилге корпузунда база ниити чуртталга бажыңында одалга системаларын хынаан. Чогуур актыны алган. Өрт медээлээр системаны бүрүнү-биле чаартып турар.
«Одалга сезонунуң талазы-биле ажылдарывыс доозулган. Колледжтиң оран-савазында база ниити чуртталга бажыңында септелге ажылдары доостур четкен. Ынчангаш сентябрь 1-де бирги курсчуларывысты уткуп алырынга белен бис» - деп, Кызылдың уран чүүл колледжизиниң директорунуң оралакчызы Оюу Монгуш дыңнаткан.
Культура адырында немелде профессионал өөредилге адырында айыттынган албан черлеринден аңгыда, уругларның 28 уран чүүл школалары өөредилгени чорудар. Шупту школалар күскү-кышкы үеге белеткенип, септеттинген. Хову-Аксы, Каа-Хем суурларда база Ак-Довурак хоорайда муниципалдыг уран чүүл школаларын төпчүткен одалгада кошкан. Арткан школалар хөмүр дажыыр керээлерин чарган. Тоора-Хем биле Кунгуртуг суурларда школалар одаар ыяш ажыглаар, оттулар чүүлдү чедирер керээлер чардынган. Межегейниң уран чүүл школазы чаа өөредилге чылында чаа котелун ажылдадыр.
Уран чүүл школалары август 28-ке чедир ам-даа уругларны немей хүлээр. Чаа өөредилге чылында культура адырында профессионал болгаш немелде өөредилге черлеринге 6 муң ажыг өөреникчилер болгаш сургуулдар өөренир.