Бөгүн Россияда армияның эң хөй шериглиг Мотоадыгжы шериглер хүнүн демдеглеп турар. Мотоадыгжылар албан езузу-биле октябрь 1-де Россияның чадаг шерииниң хүнүн демдеглээр. Орус империяның шериг ведомствозунуң дужаалы-биле 1914 чылдың август 19-та, Делегейниң бирги дайынының үезинде, дайынчы хөделиишкиннер зоназынче дайынчыларны дажыыр Бирги автомобильдиг пулемлет ротазын тургузуп, ону байырлаары чаңчыл апарган.
Тываның Баштыңы Владислав Ховалыг бистиң республикага онза ужур-уткалыг ол хүн-биле шериг албанныгларга байырын бөгүн чедирген:
«Бистиң 55-ки аңгы гвардейжи мотоадыгжы бригадавыс (дагжы) Төрээн чуртунга болгаш шериг даңгыраанга бердингенин көргүзүп, боттарының маадырлыг чоруу-биле бүдүн делегейни кайгадып, республикавысты алдаржыдып чоруур — деп, Владислав Ховалыг бодунуң блогунда бижээн. — Шериг албанныгларга болгаш хоочуннарга сеткилимниң ханызындан байыр чедирип тур мен! 55-ки гвардейжи бригаданың эрес-дидим дайынчыларынга өөрүп четтириишкинниң онзагай сөстерин дамчыттым: силер — дайынчы хей-аъттың болгаш Тиилелгеже чүткүлдүң езулуг үлегер-чижээ силер. Мурнуку одуругнуң езулуг камгалакчылары апарган силерге чоргаарланып тур мен. Дээди кол командылакчының салган дайынчы даалгаларын чедиишкинниг күүседип, аал-ораныңарже онча-менди чанып келириңерни күзедим».
1930 чылдарның эгезинде амгы үениң ок-чепсээ, артиллерия база харылзаа херекселдери-биле чепсегленген бирги механизастаттынган болгаш мотоадыгжы кезектер тургустунган. А1960 чылда Совет Армия бир-ле дугаар делегейде чүгле солдаттарны дажыыр эвес, а дайын үезинде оттуг деткимче бээр дайынчы машиналар-биле чадаг шериглерни хандырган. Удатпаанда ол турушту делегейниң өске чурттарының армиязы үлегерлеп алган.
Бо хүнде РФ-тиң Чепсектиг Күштериниң мотоадыгжы шериглери камгалакчы болгаш халдакчы даалгаларда киржип, удур келген күштерни базып, дайзынның кол туруштарын, девискээрлерин болгаш объектилерин, камгалалын узуткап, оларның бөлүктерин чок кылып, стратегтиг кол пунктуларын эжелеп, удур халдаашкыннарны чедиишкинниг чорудуп, суг шаптараазыннарын эртер дээн ышкаш, хөй янзы даалгаларны күүседип турар. Мотоадыгжылар десант операцияларынга киржип, дайзынның курлавырларын кажарлап, шериглер болгаш чепсеглээшкин командылалын будап, тылды кошкадыр даалгаларда киржип турар.
Шак ындыг каттыжыышкыннар кыжаныышкын айыылы тургустунуп келзе, база дайынчы хөделиишкиннер үезинде, күрүне кызыгаарларын камгалап, девискээр камгалалын хандырып, шериглерниң болгаш шериг техниканың турар черлерин камгалап, оруктар болгаш хандырылга шугумнарынга хайгааралды организастап, регионнарда корум-чурум болгаш турум чорукту тудуп, хамааты камгалал хемчеглерин эрттирип, ок-боолуг демиселде киржип турар. «Сөөлгү сөс бисте!» дээн мотоадыгжы бөлүктерниң кыйгырыы, түрлүг дыңналыр.
Россия Федерациязының Чепсектиг Күштериниң Чиңгине штавының 2015 чылдың ноябрь 1-де, Тыва Республикага шериг кезээн тургузар дугайында шиитпирни хүлээп алганы - 55-ки гвардейжи мотоадыгжы (дагжы) бригаданың үндезилеттинген хүнү деп санаттынар. Хөй кезиинде Тываның чурттакчылары кирген хуу составтыг бригада бөгүнде Төп шериг округунда чүгле чаңгыс каттыжыышкын болур.
Владислав Ховалыгның дилээ-биле, Россияның Камгалал яамызы 2023 чылдың февральда 55-ки бригадага «гвардейжи» атты тывысканы, Россияның Чепсектиг Күштериниң шериг каттыжыышкыннарның аразында үлегер-чижектиг кезек дээрзин бадыткап турар.