Тываның Чазааның аппарат хуралында регионнуң девискээринде COVID-19 талазы-биле эпидемиологтуг байдалды сайгарган. Росхереглекчилер хайгааралының Тыва Республикада эргелелиниң эрткен неделяда чоруткан оперативтиг шинчилелинден көөрге, республикада коронавирус халдавырындан аараан 45 таварылга бүрүткеттинген, эрткен неделяның көргүзүүнден 15 катап хөй.
Республиканың Баштыңы Владислав Ховалыг аарыыр чоруктуң санын өстүрбес дээш, профилактика ажылын күштелдирерин чогуур ведомствога онааган.
Кызыл хоорайда – 31, Кызыл кожуунда – 9, Таңдыда – 2, Тожу, Улуг-Хем база Каа-Хем кожууннарда 1-1 COVID-19-тан аараан чоруктар демдеглеттинген.
Аараан улустуң аразында: 1-ден 14 харга чедир – 23, 18-ден 65 харга чедир – 13, 65 хардан өрү назылыг 9 кижи бар.
Эрткен неделяда Халдавырлыг аарыглар эмнелгезинге 43 аарыг кижини чыттырган, олар шупту ковидтээни тодараттынган, азы шупту аарыг улустуң 95,5 хуузу. Эът изип, мага-бот ыстап, шаг чокталып, аараан кижиниң байдалы салгалыг эртип турары демдеглеттинген.
2025 чылдың эгезинден бээр республика девискээринге COVID-19-тан аарааны лабораторияга бадыткаттынган 199 таварылга бүрүткеттинген. Уруглар албан черлеринде база социал коллективтерде COVID-19-тан бөлүү-биле аараан таварылгалар бүрүткеттинмээнин Росхереглекчилер хайгааралының эргелели дыңнаткан.
Владислав Ховалыг профилактика ажылдарын идепкейжидерин тускай угланыышкынныг ведомстволарга дааскан: хөй улус чыылган черлерге маскаларны кедерин, ырак турар хемчээлди, арыг-сислигни сагыыырын база катап сагындырар.
Республиканың Кадык камгалал яамызы айыылдыг бөлүктүң кижилеринге гриппке удур тарыышкынны сентябрь төнчүзүнге чедир чорудар даалганы берген.
Өөредилге яамызы чаа өөредилге чылы эгелээринге чедир шупту өөредилге черлериниң ажылдакчыларын гриппке удур тарыткан турарын хандырар.