Регионалдыг диспетчер албанының дыңнатканы-биле алырга, август 18-тиң эртенги шагында республиканың арга-арыг фондузунуң девискээринде ниитизи-биле 1681 га черде 17 арга-арыг өрттери хып турган, ниитизи-биле 222 га черде беш арга-арыг өрттери узаттынган. Бир хүн дургузунда арга-арыгда үш өрттү өжүрген. Тожу кожуунда улуг арга-арыг өртүн өжүреринге чазылдырылга ажылдары дузалаан. Эрткен неделяда ховулуг шөлдерге 12 өрт демдеглеттинген.
Тывада өрт айыылы бергедээни-биле хамаатыларнын болгаш транспорт аймааның арга-арыгга кирерин хораан регионалдыг онза байдал уламчылап турар.
Эң хөй өрттер Тес-Хемниң арга-арыг ажыл-агыйында ниитизи-биле 686 гектар шөлдүг беш черде өрттер хып турары бүрүткеттинген, а Каа-Хемниң арга-арыг ажыл-агыйында ниитизи-биле 371 га шөлдүг беш өрт бар, 64 га шөлдүн 2 өрттү өжүрген.
Хову-Аксы, Арыг-Үзүү, Хайыракан, Ак-Дуруг, Чадаана, Өвүр, Бай-Хаак, Элегес арга-арыг участоктарының девискээрлеринде өрттер бар.
Каа-Хем, Кызыл, Мөңгүн-Тайга, Эрзин база Чеди-Хөл кожууннар девискээринде 4-кү класстың өрт айыылы хевээр арткан.
473 кижи болгаш 48 техника өрттер өжүреринче хаара туттунган. ТР-ның Арга-арыг яамызының курлавырда ам-даа 91 кижи болгаш 97 санныг техника бар. Красноярск крайдан, Омск болгаш Иркутск областардан, Бурят Республикадан база Приволжьеден «Авиалесоохрана» ажылдакчылары республикада арга-арыг өрттерин өжүреринге дузалажып турар. Регионалдыг арга-арыг болгаш бойдус сайыды Григорий Ондар «Авиалесоохрананың» Абакан салбырындан отряды бөгүн Тываже үнүпкенин дыңнаткан.