Республиканың арга-арыгларында өртке удур тускай чурум база регионалдыг онза байдал чуруму уламчылап турар. Регионалдыг диспетчер албан чериниң медээзи-биле алырга, эрткен хонукта хову черлерге 2 өрт бүрүткеттинген, оларның бирээзин өжүрген, арга-арыг зоназында 5 арга-арыг өрттери хып үнген, ниитизи-биле 1685 га черде 20 арга-арыг өрттери хып чыдар.
Өртчүлерниң, хамааты камгалал болгаш онза байдалдар албанының, тус черниң чурттакчыларның эки турачыларының каттышкан күштери-биле демисежип турза-даа, салгынныг кургаг агаар уржуундан хову өрттери үр-даа болбаанда катап хып үнүп келирин республика баштыңы дыңнаткан. Сөөлгү хонукта 2 хову өртү бүрүткеттинген, Таңды кожуунда Межегей суурдан соңгу талаже 3 км черде 8,5 га черде, Чеди-Хөл кожуунда Чал-Кежиг суурдан барыын чүкче 3 км ырак черде Хүн-Көрбес деп черде 8,5 га шөлде өрт өжүртүнген. Каа-Хем, Таңды, Тес-Хем, Тере-Хөл, Улуг-Хем, Чеди-Хөл, Эрзин, Чөөн-Хемчик база Өвүр кожууннар девискэрлеринде арга-арыг өртери хып турар.
«Өртке удур чурумга харыысалгалыг болурунче чаңгыс чер чуртугларымны кыйгырдым. Чүгле ынчаар чаа өрттерни болдурбайн, оран-сававысты, арга-арыгларывысты болгаш бойдус байлаавысты камгалап алыр бис» - деп, Владислав Ховалыг бодунуң блогунда бижээн.
Каа-Хем кожуунда Бүрен-Хем суурнуң чоогунда ооң мурнунда өжүрген өрттүң катап хып үнүп келиринге кургаг агаар салдарлыг болган. Өрттүң малчын турлагларже болгаш чурттакчылыг черлерже шилчиирин болдурас дээш, ХК база ОБ албанының, РФ-тиң ОБЯ ТР кол эргелелиниң, ол ышкаш эки турачы камгалакчылар биле тус чер чурттакчылары – шупту 60 ажыг кижи августуң 16-дан 17 дүнезинче өрттү өжүрген. Дүнекиниң бир шакка чедир өрттү бүрүнү-биле чок кылган.
Каа-Хем кожууннуң чагыргазының дыңнатканы-биле алырга, «Кара-Суг», «Көжээлиг-Ой», «Кургаг-Ой» деп черлерде турар малчын аалдарны өрттен камгалаары-биле долгандыр черлерин аңдарган. Амгы үеде бо девискээрлерде хову өрттериниң айыылы чок.
Амгы үеде Каа-Хем кожууннуң Кундустуг девискээринде өрттү өжүрүп турар. ТР-ның ХК болгаш ОБ албаны ынаар 10 кижиден болгаш 3 техникадан тургустунган немелде күштерни болгаш курлавырларны чоруткан.
Ооң-биле чергелештир Кызыл кожууннуң Кур-Чер суур чоогунда ховуда өрттер-биле демисел уламчылап турар. Чурттакчылыг черге айыыл чок, чогуур күштер ында ажылдап турар. Байдал контрольда. Бир эвес байдал нарыыдай бээр болза, немелде күштерни болгаш техниканы чорудар.