И.Г. Сафьянов аттыг орус культура төвүнге, Тыва Республикада чурттап чоруур Россия Федерациязының Чөөн чүк, Сибирь болгаш Ыраккы Чөөн чүкте үндезин чоннарның ниитилелдер съездизи болуп эрткен. Тываның Националдар агентилелиниң директорунуң хүлээлгезин күүседип турар Арслан Калзан, «Тыва» бойдус парыгы» республиканың күрүнениң бюджет албан чериниң директору Владимир Сырат, Сибирьниң үндезин чоннар ассоциациязының тожу тываларының «Тос-Чадыр» ниитилелиниң президентизи Светлана Демкина база тожу тываларының "Тос-Бөрү" ниитилелиниң предизентизи Доржа Никитин илеткелдерни номчаан.
Съездиниң хүндүлүг киржикчизи, Россия Федерациязының сенатору Шолбан Күжүгет хемчегниң киржикчилеринге Бүгү-делегейниң үндезин чоннарының хүнү-биле байырны чедирген. Бөгүн көдүрүлген шупту айтырыгларны болгаш арга-сүмелерни Россияның Федерация Чөвүлелинге сайгарарынче киирерин ол дыңнаткан. Үндезин чоннарның ёзу-чаңчылдарын кадагалап, амгы үениң амыдыралынга ооң ролюн күштелдирери чугула дээрзин сенатор демдеглеп, бойдус-биле кады чурттаар арга-дуржулганы салгакчыларынга дамчыдып берген өгбелерниң мерген угаанын демдеглээн.
Съездиниң киржикчилери элээн каш айтырыгларны сайгарган: республикада чурттап чоруур үндезин чоннарның социал-экономиктиг болгаш этнокультурлуг хөгжүлде адырында чидиг айтырыгларны, үндезин чоннарга онза камгалалдыг бойдус девискээрлерин болгаш чаңчылчаан ажыл-агыйын чорудар девискээрлерни аңгылаарының чугулазын, ол ышкаш үндезин чоннар биле үлетпүр бүдүрүлгелериниң аразында ажылдажылганың чаңгыс аайлаан кодекизин болгаш кыйгырыглыг резолюциязын сайгарып, бадылаан. Бойдус девискээрлеринге, чаңчылчаан амыдырал-чуртталгага камныг хамаарылганы, үндезин чоннарның культуразын болгаш ус-тывыжын деткиирин, ол ышкаш кандыг-даа төлевилелдерни боттандырарда ажык кады чугаалажылгаларны эрттирерин документ-биле быжыглаан.
Соңгу чүк, Сибирь болгаш Ыраккы Чөөн чүктүң үндезин эвээш санныг чоннарының делегей чергелиг хүнүнүң хемчеглерин Кызылдың культура болгаш дыштанылга национал парыгынга эвээш санныг үндезин чоннар фестивалы-биле дооскан. Аңаа Тожу, Тере-Хөл, Эрзин, Мөңгүн-Тайга кожууннардан ус-шеверлер боттарының барааннарын делгелгеге бараалгаткан.
Соңгу чүк чоннарының чаңчылчаан тывыжын, ооң иштинде сөөктен, ыяштан, даштан янзы-бүрү суй-белектерни, национал идик-хептерни, каасталгаларны, камгалалдарны, ойнаарактарны, эттээн кештерни, ол ышкаш эът болгаш сүттен кылган чемнерни делгээн. Сонуургаан улус ижин-хырынны болгаш эътти, боорзактарны, быштакты, өремени, ааржыны, чөкпекти болгаш янзы-бүрү вареньелерни азап көрген. Аңчыларның тыпканы аң кештери-биле чылыглаан тос чадырларны база тургускан.
Фестивальга Сибирьниң үндезин чоннарының шылгараңгай төлээлеринге шаңналдарны тывыскан. Тыва Республиканың Националдар херектериниң талазы-биле агентилелдиң удуртукчузунуң хүлээлгезин күүседип турар Арслан Калзан шаңналдарын тывыскан. Агентилел 28 кижини – ниитилелдерниң удуртукчуларын болгаш идепкейжилерни, ол ышкаш Сибирьниң үндезин чону – тожу тываларының езу-чаңчылдарын болгаш культуразын камгалаарынга болгаш деткииринге улуг үлүг-хуузун киирген көдээ ажыл-агый, культура, өөредилге адырларының ажылдакчыларын база хөй-ниити ажылдакчыларын хүндүлел бижиктер болгаш өөрүп четтириишкин бижиктери-биле шаңнаан.