Тываның Республика хүнүнүң байрылал хүнүнде, регионнуң Баштыңы Владислав Ховалыг республиканың хөгжүлдезинге улуг үлүг-хуузун киирген аңгы-аңгы адырларның хоочуннары-биле ужурашкан.Чугаа үезинде Владислав Ховалыг чыылганнарга байырлал-биле байыр чедирип, оларның күш-ажылы дээш өөрүп четтиргенин илереткеш, Тываның чурттакчыларның амыдырал-чуртталгазының шынарын бедидеринче угланган республикада боттанып турар кол төлевилелдерниң дугайында чугаалаан. Республика Баштыңы хоочуннарның арга-дуржулгазы болгаш оларның регионнуң онзагай чүүлдерин ханы билири кончуг чугула дээрзин демдеглээн.
"Хоочуннар бистиң ажылывысты кичээнгейлиг хайгаарап, медээлерни номчуп, Тывада болуп турар бүгү болуушкуннарны кезээде билип турарын көргеш, өөрүп тур мен. Кижи бүрүзү бодалдарын үлежип, чүгле бодунуң эвес, а чаңгыс чер-чурттугларывыстың туружу илереткен" - деп, Владислав Ховалыг ужуражылганың түңнелдери-биле бодунуң блогунда үлешкен.
Республика хүнүнде чылдың-на ындыг ужуражылгаларны эрттирип, түңнелдерни үндүрүп, дараазында базымнарны планнап, ажык чугааны чорударын база чугаалашкан.
Хоочуннар оларже кичээнгейни салып турары дээш өөрүп четтиргенин илереткеш, моон-даа соңгаар регоионнуң амыдыралынга киржиринге беленин демдеглээннер.