РФ-тиң Тудуг яамызынга ужуражылга үезинде, ведомствонуң удуртукчузу Ирек Энварович Файзуллин Тываның Баштыңы Владислав Ховалыг-биле «Амыдырал инфраструктуразы» национал төлевилелче кирип турар федералдыг төлевилелдерниң, ол ышкаш девискээрлерниң комплекстиг хөгжүлде хемчеглериниң күүселдезин чугаалашкан. Республикада хамаатыларның таарымчалыг амыдырал-чуртталгазының деңнелин бедиткен чаа бажыңнар тудуу чедимчелиг чоруп турарын ужуражылгада демдеглээн. Тываның Баштыңы чаа чуртталга тудуунуң чанында болгаш амгы үеде бар хөй-ниити шөлдериниң чаагайжыдылгазын чергелештир чорудуп турарын демдеглээн.
«Росстатистиканың сан-чурагайларындан көөрге, эрткен чылдың ол үезинге деңнээрге 2025 чылдың 6 айында Тывада 357,2 муң дөрбелчин метр чуртталга шөлүн, азы 127 хуу хөйге туткан – деп, Владислав Ховалыг бодунуң блогунда дыңнаткан. – Хөй-ниити шөлдерин чаагайжыдар ажылды ам-даа уламчылаар бис: “Таарымчалыг хоорай хүрээлеңин хевирлээри” федералдыг программа-биле бо чылын 11 девискээрни чаагайжыткан, шупту 28 шөлдү кылыры планнаттынган».
Аварийлиг чуртталга бажыңнарындан хамаатыларны өскээр көжүрер программаны боттандырарынче кол кичээнгей салдынган. Тывада 2019 чылдан бээр 7,78 муң дөрбелчин метр аварийлиг чуртталга бажыңнарын көжүрген. 2024 чылда республикада өскээр көжүрер тускай көргүзүг 105 хуу күүсеттинген – Чеди-Хөл кожууннуң Хову-Аксы суурда хөй квартиралыг үш чаа бажыңнарже 51 өг-бүле көжүп кирген. Бо чылын Хову-Аксы суурда Спортивная кудумчузунда туттунуп турар бажыңче 806,2 кв.м аварийлиг чуртталга бажыңнарындан 12 өг-бүлени азы 39 кижини көжүрери планнаттынган.
Ужуражылга үезинде Владислав Ховалыг биле Ирек Файзуллин үлетпүр болгаш социал адырларда инвестиция төлевилелдерин хөгжүдер комплекстиг планны болгаш Улуг-Хем кожууннуң Шагаан-Арыг хоорайга котельная тудуунуң төлевилелин кылырынга чугула херек документилерни белеткээрин база чугаалашкан.