«МоиФинансы.рф» порталда чурттакчы чоннуң саң-хөө билиглерин бедидериниң эң эки арга-дуржулгаларының регионалдыг реестринде мөөрей киржикчилериниң даңзызын парлаан. Россияның 81 регионундан ниитизи-биле 156 төлевилел ында кирген. Россия Федерациязының Саң-хөө яамызының саң-хөө шинчилелдериниң национал институду чагыгларны шилиир.
Олар төлевилелдериниң практиктиг күүселдезин база чурттуң өске регионнарынга ажыглаарынга беленин бадыткаар ужурлуг. Массалыг информация чепсектери-биле тускай төлевилелдерге, информация кампанияларынга, бичии уругларга болгаш аныяктарга саң-хөө өөредилгезинге, саң-хөө билиглериниң электроннуг курлавырларынга, волонтер төлевилелдеринге, кадыкшылы кызыгаарлыг болгаш улуг назылыг кижилерни деткиир база ажылчын коллективтерде өөредилге төлевилелдеринге киржип болур 12 кол угланыышкынны тодараткан.
Тыва Республика “Уруглар болгаш аныяктарга саң-хөө чырыдыышкыны” бөлүүнге шенээн “Имнеп-айтыр дылга саң-хөө билиглери” база “Саң-хөө билиглериниң базымнары” деп ийи төлевилели-биле мөөрейде киржип турар.
Оюн хевиринге организастаан бирги төлевилел дыңнавас школачыларга имнеп-айтыр дылды ажыглап тургаш, саң-хөө билиглерин өөредиринче угланган. Төлевилелдиң кол сорулгазы – дыңнаары кошкак өөреникчилерниң саң-хөө үндезиннериниң эге билиглерин болгаш ону шиңгээдип алганын хынаар, саң-хөө адырында салым-чаяанныг оолдарны илередир, оларга келир үеде мергежилин шилип алырынга дузалажыр. Өөреникчилерниң имнеп-айтыр дылынга тестилерни, викториналарны болгаш тывызыктарны мөөрейге ажыглаар.
Ийиги төлевилел Кызыл хоорайның 7-8 класстың өөреникчилеринге өөредиглиг квест оюну кылдыр кирген. Ооң сорулгазы – школачыларның саң-хөө билиглерин сургаары база экономика билиглериниң деңнелин бедидери. Квест-оюннуң сорулгазы – саң-хөө билиглерин шиңгээдиринге сонуургалды күштелдирери, саң-хөө шиитпирлерин хүлээрде практиктиг билиглер-биле чепсегленири база алган медээлерин шынарлыг ажыглаар арга-мергежилди сайзырадыры.
Бистиң республикның төлевилелдерин МоиФинансы.рф сайтыда шөлүг-биле 2025 чылдың чай төнчүзүнге чедир онлайн бадылап болур. Система «Google», «ВКонтакте» азы «Яндекс» таварыштыр бүрүткедип алыр аргаларын сүмелээр. 2025 чылдың күзүнүнде, Красноярскыга болуп эртер регионнар аразының конференциязынга түңнелдерни үндүрер.