Россияның үлетпүр болгаш садыг яамызынга, Россияның үлетпүр болгаш садыг сайыды Антон Алиханов биле Тываның Баштыңы Владислав Ховалыг олар ужурашкан. Регионнуң үлетпүр хөгжүлдези – ужуражылганың сорулгазы болган. Республиканың мурнады боттандырар төлевилелдеринге күрүне деткимчезиниң немелде хемчеглеринче онза кичээнгейни угландырган. 2022 чылдан 2025 чылдың бирги кварталынга чедир үеде Россияның Үлетпүр болгаш садыг-саарылга яамызы таварыштыр Тыва Республиканың үлетпүр бүдүрүлгелери күрүне деткимчези кылдыр ниитизи-биле 17 ажыг млрд рубль федералдыг акша-хөреңгини алган.
"Тываның үлетпүр хөгжүлдезиниң айтырыгларын сайгардывыс. Ылаңгыя бистиң "ТываАгро" база "Кызылдың үлетпүр парыгы" технологтуг парктарывысты Россияның Үлетпүр болгаш садыг яамызының реестринче киирер айтырыгны көрдүвүс, үлетпүр адырында күрүне деткимчелерин алыр арганы ол бээр" - деп, Тываның Баштыңы социал четкилерде бодунуң блогунда ажыл-агыйжы ужуражылганың түңнелдерин бижээн.
Ол реестрже кирери чиигелделерниң чаа деңнелин алырын республика организацияларынга магадылаар. Үлетпүр болгаш садыг яамызының реестри – РФ-тиң Чазааның бадылаан негелделери езугаар чуртка бүдүрген эрге-байдалын бадыткаан барааннар болгаш ачы-дузалар дугайында медээлер кирген албан езузунуң электроннуг курлавыры болур. Реестрже кирген бүдүрүкчүлер үндүрүг чиигелделерин, субсидияларны, грантыларны, бүдүрүлге чарыгдалдарының чамдыызын компенсация кылдыр эгидеринге, чиигелделиг чээли программаларынга киржилгезин, сертификат алырын бөдүүнчүдер дээш, оон-даа өске чүүлдерже кордап болур.
Ооң-биле чергелештир күрүнениң талазындан продукциязының шынарын болгаш бүзүрелдиин албан езузу-биле бадыткааны компанияның эрге-байдалын, кол садып алыкчыларның бүзүрелин бедидер, а российжи бүдүрүкчүнүң статузун алыры - найыралдыг чурттарның делегей рыноктарынче үнер арганы бээр.
«Техмашсервис» АН-ның продукциязын чүдүрген ортумак деңзилиг контейнерлерни демир-орук транспорту-биле аргыштырарын бадылаары - чугааның сөөлгү айтырыы болган. Ооң мурнунда Красноярск форумунга «Техмашсервис» компанияның удуртулгазы «Хандагайты – Боршоо» эрттирилге пунктузунуң чанында тургустунган тускай экономиктиг зонаже кирер сорулгазын бадыткаанын сагындыраал. Компания бодунуң продукциязын чурттан үндүр сөөртүрүнче угландырган.
Ужуражылганың төнчүзүнде Тываның Баштыңы көргүскен деткимчези дээш Антон Алихановка өөрүп четтиргенин илереткен.