Wildberries & Russ (РВБ) база АНО «Стратегтиг инициативалар агентилели» автономнуг коммерцияга хамаарышпас организацияның кады кылган инициативазы болур “Өзүлде шөлү” федералдыг төлевилелди республикага таныштырган. Төлевилел биче болгаш ортумак бизнестиң интернет садыг шөлдеринге чедиишкинниг ажылынга дузалаар ужурлуг.
Петербургтуң делегейниң экономиктиг шуулганының үезинде (ПМЭФ-2025), республика Баштыңы Владислав Ховалыг биле Wildberries-тиң үндезилекчизи Татьяна Кимниң ужурашканының түңнелинде, Тывада төлевилел ажылдап эгелээнин сагындыраал.
PRO.WB сайгарлыкчыларны хөгжүдер болгаш деткиир төптүң эксперттери интернет-садыглаашкын шөлүнче үнериниң болгаш Wildberries-ке садып-саарарының аргаларын база садыгжыларга тааржыр арга-хевирлерни таныштырган. Хереглел рыногунда аңгы-аңгы адырлардан 40 хире тыва сайгарлыкчы өөредилге программазын эрткен.
«Бо арга киржикчилерге бизнестиң хемчээлин калбартып, чаа рыноктарже үнер арга-дыр» - деп, Тываның Экономиктиг сайзырал болгаш үлетпүр яамызы демдеглээн.
Программа комплекстиг деткимчени саналдаар: интернет шөлдерге садып-саарарынга өөредирин, продукцияны бурунгаарладырының болгаш суртаалдаарының бүгү чадаларында үдээрин. Тус чер бүдүрүкчүлериниң барааннары-биле «Тыва Республикага бүдүрген» деп делгелгени тургузар.
Ол хемчегге регионнуң сайгарлыкчылары боттарының брендилерин болгаш республикада бизнестиң аргаларын көргүскен. Ол эгелээшкинни «Үре-түңнелдиг болгаш чижилгелиг экономика» национал төлевилел күүселдези-биле боттандырып турар.