Республиканың чазаанга эрткен Тываның Баштыңының чанында Эртем болгаш эртем-техниктиг политика талазы-биле чөвүлелдиң хуралында, 2025 чылда республика Баштыңының грантызын алыр аныяк эртемденнер мөөрейинге тиилээннерге шаңналдарны тывыскан. Тываның Чазааның Даргазының оралакчызы Орлан Сарыглар регион удуртукчузунуң адындан шаңналдарны тывыскан.
Республиканың Баштыңы Владислав Ховалыг мөөрейниң тиилекчилеринге байыр чедириишкинин бодунуң блогунда бижээн. Бо чылын грантының түңүн 100 муң рубльден 200 муң рубль чедир өстүрер шиитпирни хүлээп алганын ол демдеглээн. Оон аңгыда, бо чылын тургускан негелделерге дүүштүр мөөрейни Саң-хөө күрүне деткимчезиниң хемчеглерин хандырар порталга – электроннуг хевирге бир дугаар эрттиргенин дыңнаткан.
«Тиилээн аныяк эртемденнеривиске байырны чедирип, республикавыстың чаагай чоруун хөгжүдер төлевилелдерин чедиишкинниг боттандырарын күзедим!» – деп, Владислав Ховалыг онзалап демдеглээн.
Республика Баштыңының грантылары дээш мөөрейге эң хөй саннар алган төлевилелдерлиг аныяк эртемденнер тиилээн.
Тываның күрүне университединиң информатика кафедразының эргелекчизи, физика-математика эртемнериниң кандидады, доцент Чодураа Монгуш физика-техниктиг эртемнерге тиилээн. Биосферлиг шинчилелдер төвүнүң биологтуг шинчилелдер лабораториязының кол специализи Чинчи Монгуш бойдус эртемнеринге эң хөй санны алган. Национал школа хөгжүдер институттуң ажылдакчызы, эртемден секретарь, төөгү эртемнериниң кандидады Анай-Хаак Базырчап гуманитарлыг болгаш ниитилел эртемнеринге тиилээн. Тыва Республиканың эмчи-социал айтырыглар болгаш удуртулга эртем-шинчилел институдунуң регионалдыг эмчи шинчилелдер лабораториязының улуг эртем ажылдакчызы, невролог эмчи Айдыс Кыргыс медицина адырынга тиилээн. Тываның күрүне университединиң мал ажыл-агыйында комплекстиг шинчилелдериниң эртем-шинчилел лабораториязының ажылдакчызы Айлана Комбу көдээ ажыл-агый угланыышкынынга тиилээн.