Республиканың Баштыңы Владислав Ховалыгның даалгазы-биле май айдан чыгган гуманитарлыг дуза август 12-де Кызылдан Донецкже үнүпкен. Командирлер чөвүлелиниң төлээлери чүъктү уткуп ап, угланыышкыннар аайы-биле дайынчыларже үлеп, дамчыдар. Регионнуң яамылары болгаш ведомстволары, Тываның чурттакчылары болгаш сайгарлыкчылары, организациялар, Улусчу полктарның волонтерлары гуманитарлыг дузаны чыгган.
«Баштайгыларның шимчээшкини» регионалдыг салбырның идепкейжилери дайынчыларга чүък-биле кады дамчыдар чагааларны болгаш открыткаларны база белеткээн.
Янзы-бүрү организацияларның болгаш волонтерларның чыып алганы техниктиг херекселдер, дериг-херекселдер, идик-хеп болгаш аъш-чем аймаан чүдүрген. Улусчу фронтунуң «Шупту чүвени Тиилелге дээш!» акциязы-биле гуманитарлыг дузаламчыны чоруткан. «Деткимче» регионалдыг фонд гуманитарлыг дуза чедирер 20 тоннаның чүък машиназынга кывар-чаар чүүлдү чаңчыл езугаар хандырган.
«Амгы үеде Ада-чуртувусту камгалаар кол болгаш харыысалгалыг албан-хүлээлгени күүседип чоруур бистиң оолдарывыска гуманитарлыг ачы-дуза чыырынга киришкен чаңгыс чер-чурттугларымга сеткилимниң ханызындан өөрүп четтиргенимни илередип тур мен» - деп, Владислав Ховалыг бодунуң блогунда бижээн.
Тыва Республиканың шефтээшкинде алганы Луганск Улус Республиканың Свердловск хоорайының тайбың чурттакчыларга дээш чыгган 8 тонна гуманитарлыг дузаламчыны база чүъкте каткан. Ол ышкаш 3 дрон, 2 мотоцикл, 1 квадроцикл, 2 автомобиль, 70 чаштынар четкилер, 3 генератор болгаш бистиң шериглеривиске херек өске-даа чүүлдерни чоруткан.
Улусчу фронтунуң аныяк идепкейжилери, Росгвардияның ажылдакчылары, 55-ки аңгы даг мотоадыгжы бригаданың шериг албанныглары посылкаларны чүдүрүшкен.
Республика Баштыңының демдеглээни-биле алырга, хөй тонналыг чүък машиназын волонтер чолаачы Александр Монгуш мунуп чоруур, ол бодунуң күзели-биле бистиң дайынчыларывыска дуза чедирер дээш узун орукче ийи дугаар үнүп турары ол. Ол чүс-чүс километрлерде берге оруктарны болгаш агаар-бойдустуң өскерлиишкиннерин эртер.