Владислав Ховалыг Москвага ажыл-агыйжы сургакчылаашкан үезинде, РФ-тиң транспорт сайыды Андрей Никитин-биле ужурашкан. Ужуражылгада регионнуң автомобиль оруктарын өй-тап байдалче киирериниң, ол ышкаш делегей чергелиг транспорт коридорларын хөгжүдериниң айтырыгларын сайгарган. Тыва Республиканың регионалдыг кол оруктарының узуну – 645 км.
«Ажылчын сургакчылаашкан үезинде Россияның транспорт сайыды Андрей Сергеевич Никитин-биле ужураштым. Тывада автомобиль оруктарының байдалын база делегей чергелиг транспорт оруун хөгжүдериниң айтырыгларын сайгардывыс» - деп, Владислав Ховалыг бодунуң блогунда дыңнаткан.
Ужуражылганың киржикчилери 236,7 км узун «Абаза – Ак-Довурак» участогунда «Абакан – Ак-Довурак» регионалдыг автоорукту экижидир кылырының айтырыын көрген. Бөгүнде орук участогунуң чүгле 80 километри чүгээр байдалдыг. Регионалдыг орук фондузунга көрдүнген күрүне деткимчезинден берип турар акша-хөреңги-биле орукту чоорту экижидип болур.
Ол ышкаш Р-257 «Енисей» автооруктуң 803-тен 1116 км-ге чедир 2 дилиндектиг орук участогун федералдыг стандартче киирери республикага чугула. Оруктуң ол участогунуң 58,3 хуузу ажырбас. Р-257 автооруктуң болгаш кылымал тудугларының септээриниң акшаландырыышкынын Росавтодорга сайгарып көөрүн демдеглээн.
Моол-биле күрүне кызыгаарында «Хандагайты» автомобиль эрттирилге пунктузун эде чаартыры – мурнады боттандырар айтырыг. 2024 чылда эрттирилге пунктузун 41 муң ажыг, а ооң мурнунда чылын – 38 муң хире машина эрткен.
Хүнде-ле 200 чедир транспорт аймаа эрттер апаар пунктуда амгы үеде эде чаартылга ажылдары чоруп турар. Бо хүнде кол тудуглар туттунган, суг хандырылга четкизин салган, деңзилээр дериг-херексел комплекизин эптээн. Чаартылга ажылдары 2026 чылда доостур.
2024 чылда Кызылдың аэропорту 138 муң ажыг пассажирни аргыштырган, 2023 чылга деңнээрге 25 хуу хөй. 2025 чылдың бирги чартыының түңнелинден көөрге, эки бурунгаарлаашкын бар – аргыжылга 7,5 хуу көвүдээн. Регион авиааргыжылгада ийи субсидия программазын боттандырып турар.
«Сибирь дыштанылгалары» деп национал турисчи маршрут Тываны таварты эртип турар. Абакандан эгелээш, Красноярск край, Хакасия, Тыва таварып эрткеш, Кызылга төнер маршруттуң узуну 1244 километр.
«Транспорт яамызы-биле кады ажылдажылгавыс регионда чүгле автомобиль оруктарын эвес, а авиация болгаш туризм инфраструктуразын хөгжүдеринче угланган» - деп, Владислав Ховалыг ужуражылга соонда демдеглээн.