Тыва Республиканың Өөредилге яамызы «Мээң башкым» губернатор төлевилелиниң «Мен – башкы мен» программазын боттандырып, 2025 чылда педагогиктиг дээди өөредилге черлериниң доозукчуларын деткээн чаңгыс катап бээр акша төлевириниң конкурузунче билдириишкиннерин хүлээп эгелээн.
2025 чылдың сентябрь 1-ге чедир конкурстуг шилилгеге киржир билдириишкиннерни хүлээр.
Конкурс шилилгезинге киржир дизе, Россия Федерациязының девискээринде дээди өөредилге программалары-биле ажылдап турар организацияның бо 2025 чылда дипломунуң бары, күш-ажыл керээзинге дүүштүр шалың төлевириниң ставказы-биле школада неделяда 18 шактан эвээш эвес шактарлыг ажылдаары дээн ышкаш, тодаргай негелделерге дүгжүп турар ужурлуг. Ооң-биле чергелештир билдириишкин киирикчизиниң назы-хары документилер дужааган хүнүнде 35 хардан ашпас ужурлуг.
Билдириишкиннерни сайгарган соонда, чаңгыс катап төлээр компенсация төлевирлерин алыр тиилекчилер билдинер. Протокол шиитпиринге даянып, төлевирлер алыкчылары-биле үш талалыг дугуржулгаларны 2025 чылдың сентябрь төнчүзүнге чедир чарар. Планнаттынган акшаландырыышкынның хемчээли болгаш тиилекчилерниң ниити санындан чаңгыс кижиниң алыр компенсациязының түңү тодараттынар.
Республиканың Өөредилге яамызының "ВКонтакте" социал четкиде арынындан (vk.com/wall-38636573_51644) конкурс киржикчилеринге негелделерни болгаш кандыг документилер дужаарын тодаргай билип ап болур. Тываның өөредилге сайзырадыр болгаш мергежил бедидер институду - регионалдыг оператор билдириишкиннерни дараазында адресте хүлээп турар: Кызыл хоорай, Чургуй-оол кудумчузу, б. 1 (каб. 311). Немелде тайылбырны дараазында телефондан билип ап болур: +7(39422)3-00-25, эл. почта: metodtyva@mail.ru.
Регионнуң Баштыңы Владислав Ховалыгның эгелээшкини-биле, республиканың школаларын шыырак мергежилдиг башкы кадрлар-биле хандырар, аныяк башкыларны деткиир база удуртукчу кадрлар системазын хөгжүдер кол сорулгалыг «Мээң башкым» төлевилелди Тыва Республикада боттандырып турарын сагындыраал. Башкылар кадрларын деткээн бо хемчегниң боттаныышкыны ниити өөредилге организацияларынче аныяк башкыларны хаара тудуп, хостуг башкы олуттарының санын эвээжедиринче угланган. 2021 чылдан бээр 300 ажыг аныяк специалистер деткимчениң бо хемчээн ажыглап, Тываның башкылар ниитилежилгезиниң одуруунче киргеннер.