Республиканың Кадык камгалал яамызының дыңнатканы-биле алырга, бо чылын “Идепкейжи узун назын” чаа национал төлевилелдиң күүселдези-биле бирги эмчи дузазын чаартыр программа езугаар Тываның эмнелге албан черлеринге 179 санныг эмнелге дериг-херекселдерин база «Эмчи реабилитациязы кадыкшылды катап тургузарынга дээштиг арга» төлевилелден 196 санныг реабилитация дериг-херекселдерин садып алган. Тывада 270 ажыг аттыг дериг-херекселдерни эккелген.
Республиканың Баштыңы Владислав Ховалыг бодунуң блогунда Тываның көдээ суурлар болгаш биче хоорайлар чурттакчыларынга эмчи дузазының чедингирин бедидери-биле көжүп чоруур эмнелге комплекстерин садып алганын демдеглээн: «Бо чылын Чөөн-Хемчиктиң кожууннар аразының эмнелге төвү көжүп чоруур маммографтыг шинчилгелерни чорудар аргалыг апарган. Сентябрь төнчүзүнге чедир көжүп чоруур флюорографтыг шинчилел комплекизи республикага кээр. Ол ышкаш бо чылын Тываның эмнелге организацияларының автопарыгынга 46 автотранспортту немей садып, эмчи дузазының шынарын экижидер».
“Өг-бүле национал төлевилелди боттандырып, эмнелге дериг-херекселдери-биле четчелээшкин ам-даа чоруп турар. Бо чылын божудулга албаны чаа төрүттүнген чаштарны ажаап-дежээр бедик технологиялыг 54 техниканы алган, чаштарның амы-тынын чүгле камгалап эвес, а кадыынга айыылды эвээжеткен.
Бо чылын “Өг-бүле” национал төлвелел-биле шупту 151 эмчи дериг-херекселин садып алыры планнаттынган.