«Аныяктар болгаш уруглар чаштар» национал төлевилелче кирип турар «Бүгү-ле экини уругларга» федералдыг төлевилел боттаныышкыны-биле Сүт-Хөл кожууннуң Бора-Тайга суурда ниити өөредилге школазында капитал септелге ажылдары доозулган. Национал төлевилел езугаар республикада бо чылын ниитизи-биле алды көдээ школа чаарттынып турар. Тываның Баштыңы Владислав Ховалыгның бодалы-биле алырга, өөредилге албан черлериниң эде чаартылгазы өөредилге чорудуунуң шынарын бедидеринге идигни бээр.
Владислав Ховалыг Сүт-Хөл кожууннуң Бора-Тайга суурда школа септелгезиниң ажылдары доозулганын дыңнадып тура, элээн хөй чүүлдер кылдынганын демдеглээн: «Дээвирин, соңгаларын, эжиктерин солуп, суг болгаш чылыг системаларын бүрүнү-биле чаартып, спорт залды септээн. Чаа парталарны, сандайларны база столоваяда эт-септи, ол ышкаш амгы үениң өөредилге болгаш кижизидилге херекселдерин салып эгелээн» - деп, Тываның Баштыңы бодунуң блогунда бижээн.
Объектиде септелге ажылдары апрель 1-де эгелээн. «Депшилге» тудуг организациязы ажылдарны үезинде дооскан. Иштики ажылдардан аңгыда, чоок-кавы девискээрни чаагайжыдып, ногаажыткан. Школаның коллективи Россияның Өөредилге яамызының сүмелээни езугаар школа шөлдерин шимээр.
«Аныяктар болгаш уруглар» национал төлевилел боттаныышкыны-биле, 2025 чылда Тыва Республикада алды көдээ школада капитал септелге ажылдары чоруп турар. Бора-Тайга школазындан аңгыда, апрельда эгелээн Чеди-Хөл кожууннуң Хову-Аксы, Тес-Хем кожууннуң Чыргаланды, Кызылдың Сукпак, Барыын-Хемчиктиң Аксы-Барлык база Бай-Тайганың Кызыл-Даг суурлар школаларында үндезин септелге ажылдары уламчылавышаан. Төлевилелдер күүселдезин 300 хире млн. рубль акшага акшаландырган.