Чаа өөредилге чылында Тываның 100 ажыг школалары «Төрээн чурттуң айыыл чок чоруунуң болгаш камгалалының үндезиннери» база «Күш-ажыл» деп эртемнерге амгы үениң дериг-херекселдерин болгаш өөредилге материалдарын алыр. «Аныяктар болгаш уруглар» деп чаа национал төлевилелдиң составынга кирген «Бүгү-ле экини уругларга» деп федералдыг төлевилелди республикага боттандырары-биле оларны алыр.
Эрткен өөредилге чылындан эгелеп школаларга вмыдыралдың айыыл чок чоруунуң чаарттынган хевири болур «Төрээн чурттуң айыыл чок чоруунуң болгаш камгалалының үндезиннери» деп эртемни өөредип эгелээнин сагындыраалыңар. Программада чүгле хүн бүрүнүң амыдыралынга, транспортка, бойдус хүрээлеңинге болгаш информация шөлүнге айыыл чок алдынарның дүрүмнери эвес, а шериг белеткелиниң эге билиглери база кирген.
Өөреникчилер бирги дуза көргүзериниң, шериг херээниң эге билиглерин, чыскаал, тактиктиг, часпайн адарының белеткелди болгаш эмчи дузазын шиңгээдип алыр.
Ынчангаш школаларга “Технология” кичээлин эрттиреринге амгы үениң дериг-херекселдери: даараныр машиналарны, демир болгаш ыяш станоктарын тургузуп, класстарны эде чаарткан, ол ышкаш «Төрээн чурттуң айыыл чок чоруунуң болгаш камгалалының үндезиннерин» өөренир өрээлдерни ок-чепсектиң дүрзүлери, противогазтар, хууда камгалал дериг-херекселдери, баштайгы реанимация болгаш эмчи дузазы көргүзер дериг-херекселдер-биле чепсеглээн.
«Ол эртемнерни чедимчелиг болгаш солун кылдыр өөредир эрттирер дээш, класстарны амгы үениң өөредилге дериг-херекселдери-биле четчелеп, чаарткан» - деп, Тываның Өөредилге яамызының специалистери демдеглээн.
Бо эгелээшкиннерниң ачызында республиканың школачылары келир үеде ажыктыг апаар практиктиг билиглерни болгаш мергежилдерни чедип алыр аргалыг. Бо базым амгы үениң өөредилге хүрээлелин тургузарынче, уруг бүрүзү бодунуң арга-шинээн ажыдып, амыдыралга белеткенир аргазы болур.