Регионалдыг диспетчер албанының оперативтиг медээлери-биле алырга, 2025 чылдың август 7-ниң эртенинде Тыва Республиканың арга-арыг фондузунда 2749 га ниити шөлдүг 13 арга-арыг өрттери хып турган, 644 га черде үш арга-арыг өрттерин өжүрген. Сөөлгү хүнде 390 га шөлде 1 арга-арыг өртүн өжүрген.
Регионалдыг Арга-арыг яамызының дыңнатканы-биле алырга, амгы үеде Элегестин, Бай-Хаактың, Хову-Аксының, Самагалтайның, Арыг-Үзүүнүң, Ак-Дуругнуң, Чадаананың, Чыраа-Бажының, Сизимниң база Кунгуртугнуң арга-арыг ажыл-агый участоктарында өрттер демисежип турар. Хайыракан, Сүт-Хөл болгаш Чадаананың үш арга-арыг девискээринде хып турар өрттер өжүртүнген.
Сизимниң арга-арыг ажыл-агыйында 390 га шөлде өрттү база өжүрген. Өрттер өжүрүлдезинде 395 кижи база 25 техника хаара туттунган. Арга-арыг яамызының курлавырында ам-даа 107 кижи база 120 санныг техника белен байдалда.
Республиканың Баштыңы Владислав Ховалыг Абакан, Красноярск, Омск, Бурятия, Иркутск база Приволжьеден «Авиалесоохрана» ФБА парашют-десант өрт албанының кезектери республикага дузаны көргүзүп турарын бодунуң блогунда дыңнаткан. «Сөөлгү хонуктарда агаар-бойдус чаъс чагдырар самолеттарны ажыглаарынга таарымчалыг болганындан, өрттерниң байдалы чүгээртээн. Ындыг болзажок арга-арыг өрттерин бүрүнү-биле чок кылыр дээш бүгү күжениишкиннерни салыр херек» - деп, Владислав Ховалыг бижээн.
Өрт айыылының үези эгелээнден бээр ниитизи-биле 132 арга-арыг өрттери бүрүткеттинген. Баштайгы медээлер-биле алырга, өрттерниң хөй кезии чаңныктардан үнген, а 35 таварылгада кижиниң буруузу-биле өөскээн. Өрттерни өөскүткен буруулуг кижилерни илередири-биле арга-арыг инспекторлары иштики херектер органнарынче база Россияның Онза байдалдар яамызының Тыва Республикада кол хайгаарал болгаш профилактика ажылының эргелелиниң девискээр килдистеринче 131 билдириишкинни киирген.
Республика Баштыңы Тываның девискээринде чарлаттынган регионалдыг онза байдал чурумун сагыырынга харыысалгалыг болурунче чурттакчы чонну кыйгырган. «Чаа өрттерни болдурбазының арга ол-дур» - деп, ол айыткан.
Тыва Республиканың девискээринге 2025 чылдың июль 29-тан эгелеп регионалдыг онза байдал чурумун киирип, хамаатыларның болгаш транспорт аймааның арга-арыгже кирерин шуут хораанын сагындыраал. Чыл эгезинден бээр арга-арыгларда өртке удур онза чурумун хажыткан кижилерге хамаарыштыр 30 административтиг херекти оттурган.