Июль төнчүзүнде республикада өөредилге черлериниң чаа өөредилге чылынга ниити белеткели 70 ажыг хуу болган деп, Тыва Республиканың Өөредилге яамызы дыңнаткан. Кызыл хоорайның, Барыын-Хемчик болгаш Улуг-Хем кожууннарның өөредилге черлери, ол ышкаш республиканың эмчи колледжизи колдуунда белен. Россия Федерациязының Чырыдыышкын яамызы, федералдыг инспекция август 18-ке чедир, школалар болгаш өске-даа өөредилге черлериниң чаа өөредилге чылынга белеткелин хынаар.
Тыва Республиканың девискээринде 428 өөредилге албан черлери – 171 школа, 221 уруглар сады, 20 немелде өөредилге болгаш 16 ортумак профессионал өөредилге албан черлери ажылдап турар.
Тускай комиссия аңгы график планы езугаар чаа өөредилге чылынга белеткелдиң хыналдазын чорудар. Комиссия хыналда түңнелдеринге даянгаш, өөредилге чери белен дугайында бижикти бээр.
Хыналда үезинде санитарлыг арыг-силиг болгаш өөредилге негелделерге дүүштүр өөренир шөлдериниң беленинден аңгыда, айыыл чок чорук нелгелдерин хандырганын хынаар. Кадыкшыл байдалы кызыгаарлыг кижилерге шаптык чок хүрээлелди хандырарынче онза кичээнгейни углаан. Ол ышкаш уруглар садтарында бөлүктерни, школаларда класс-комплектерни база техникумнарда өөредилге бөлүктерин, ол ышкаш өөредилге черинде башкылар составын четчелээнин хынаар.
Муниципалдыг өөредилге организацияларының күскү-кышкы белеткели база хыналдада. 330 өөредилге черлери боттарының котельнаяларынга хөмүр болгаш ыяштың чогуур курлавырын мөөңнээр ужурлуг. Муниципалдыг тургузуглар боттарының акша-хөреңгизи-биле одалга системазының (котельнаяның кезектерин), канализация болгаш суг хоорзаларының септелге ажылдарын кылдырып турар. Бай-Тайга, Барыын-Хемчик, Мөңгүн-Тайга, Бии-Хем, Сүт-Хөл, Таңды, Эрзин кожууннарның база Кызыл биле Ак-Довурак хоорайларның өөредилге эргелелдери эрткен одалга сезонун эки хандырганын демдеглээн.
Регионнуң элээн каш өөредилге организацияларында капитал септелге чоруп турар. «Аныяктар болгаш уруглар» национал төлевилелдиң «Шупту эки чүүлдерни уругларга» федералдыг төлевилели-биле алды көдээ школаларда капитал септелге ажылдары кидин түлүк. Мөңгүн-Тайга кожууннуң Мугур-Аксы суурда уруглар садында капитал септелгени «Өг-бүле» национал төлевилел-биле чоруткан. «Профессионалитет» федералдыг программаны боттандырып, Балгазын суурда Агроүлетпүр техникумунуң өөредилге өрээлдерин база ниити чуртталга черин шуут өскертир чаарткан. «Көдээ черлерниң комплекстиг хөгжүлдези» программа-биле Шагаан-Арыгның 1 дугаар школазын септеп турар. Күрүне керээзинде айыттынган хуусааның аңгы графиги езугаар ол объектилерниң беленин хынаар.
Агар болгаш капитал септелге соонда чаарттынган школалар чаа өөредилге чылында 73 муң уругларны хүлээп алыр. 6500 хире оолдар, уруглар парталар артынга бир-ле дугаар олуруптар, оларны 11 муң башкы хүлээп алыр.