Владислав Ховалыг «Школа 21» удуртукчулары Роланда Рассоха, Елена Петрова база Ажаалга банкызының Кызылда салбырының эргелекчизи Алина Таспанчик-биле Тываның Чазаанга ужурашкан. Кызылга «Школа 21»-ниң филиалын ажыдырын талалар сайгарып чугаалашкан.
Төлевилелдиң төлээлери «Школа 21»-ниң «Робототехника база инженерия», «Чурагайлыг чогаадылга», «Программирование», «Оюннар чогаадыры» курстарынга 11-ден 17 харга чедир уругларга өөренир арганы берип турар угланыышкыннарны таныштырган.
Программа аайы-биле 9 ай үргүлчүлээр өөредилгениң бир бөлүүнге-ле 12 хире уруг кирер. Өөредилге эгелээринге чедир уругларга чурагай технологияларының делегейи-биле таныштырган мастер-класстар база дүрген курстар эртер.
«Кызылга школаның салбырын ажыдар арганы сайгарып чугаалаштывыс. Ол регионда IT-инфраструктураны хөгжүдеринге чугула базып апарып, тус черниң аныяктарынга чурагайлыг улуг улганыышкынның кезээ апаарынга идигни бээр. Ол эгелээшкин дузазы-биле экономиканың дүрген сайзыраан секторунга кадрларны белеткеп болур бис» – деп, Владислав Ховалыг бодунуң блогунда ужуражылганың түңнелин бижээн.
Уругларны өөредирде, практикаже кичээнгейни угландырып, дең эргелиг арганы ажыглап турар. Өөредилге үезинде уруглар командалыг ажылдарга киржип, боттарының төлевилелдерин тургузарынга бот-боттарынга дузалажып, коллективке ажылдап, шиитпирлерни хүлээп, харыысалгазын сайзырадып, амыдыралда херек чүүлдеринге белен чоруурунга хевирлеттинер.
IT-технологиялар, инженерия болгаш чогаадыкчы чорук дугайында чугула билиглеринден аңгыда, эвилең-ээлдек болурун сайзырадыр. Өөредилгениң чедиишкинниг болуру колдуунда өөредилге чорудуунуң байдалдарындан хамааржыр деп, төлевилелдиң удуртукчулары демдеглээн. Амгы үениң дизайны, техниказы болгаш дериг-херекселдери-биле чепсегленген технологтуг өөредилге зоназы турар ужурлуг.
Уругларның профессионал өзүлдезинде хүрээлеңни деткип, хостуг тайылбырлап база үре-түңнелдиг чугаалажып шыдаар дагдыныкчы «Школа 21» төлевилелдиң өөредилге үезинде кол рольду ойнаар. Элээдилер «Школа 21»-ге өөренген соонда, чуруктар болбаазырадырынга болгаш даанган онаалдаларын күүседиринге машина көрүжүн ажыглап турар роботтарга программалар чогаадыр арга-мергежилди билип алыр. Олар машина өөредилгезиниң аргаларын канчаар ажыглаарын, объектилерни, им-демдектерни болгаш арын-шырайны таныырынга белен хевирлерни ажыглаарын шиңгээдип алыр. Ол ышкаш шын херекселдерни база ажыглаар. Роботтарга камераларны канчаар тургузуп, ажыглаарын, схемаларны ажылдадырын база өөренир.
Владислав Ховалыг ужуражылга соонда, регионалдыг өөредилге болгаш чурагайлыг хөгжүлде яамыларынга Кызылга уругларга «Школа 21»-ниң салбырын ажыдарының негелделерин өөренип көөрүн база төлевилел удуртукчулары-биле организастыг айтырыгларны ажылдап кылырын дааскан.