Регионалдыг диспетчер албан чериниң оперативтиг медээлеринден алырга, 2025 чылдың август 5-тиң эртенинде Тыва Республиканың арга-арыг фондузунуң девискээринде ниитизи-биле 2703 га черде 18 арга-арыг өрттери хып турар, 449,5 га ниити шөлдүг черде үш арга-арыг өрттерин өжүрген. Дүүн ниитизи-биле 5,1 га черде ийи арга-арыг өрттерин чок кылган.
Элегес, Бай-Хаак, Хову-Аксы, Самагалтай, Арыг-Үзүү, Ак-Дуруг, Хайыракан, Чадаана, Сүт-Хөл, Чыраа-Бажы, Сизим база Кунгуртуг арга-арыг участоктарының девискээринде өрттер хыппышаан. Кунгуртуг, Сизим база Элегестиң – үш арга-арыг ажыл-агыйларында отту чавырылдырган.
Сүт-Хөлдүң база Сизимниң арга-арыг девискээрлеринде өрттүң үнген черлерин шуут узуткаан.
369 кижи база 30 санныг техника өрттер өжүреринге киришкен. Тыва Республиканың Арга-арыг болгаш бойдус яамызының курлавырында 106 кижи база 115 санныг техника бар.
«Авиаарга-арыгкамгалалы» федералдыг күрүнениң бюджет албан чериниң өртке удур аңгы-аңгы парашют-десант кезектеринден специалистер командалары: Абаканның авиакилдизинден - 33, Красноярск край эргелелинден - 21, Омск облазының авиаарга-арыг камгалал албанындан - 49, Бурят Республикадан - 40 специалист, Иркутск облазының авиаарга-арыг камгалал албанында 17 төлээ база Приволжьениң авиаарга-арыг камгалал албанының 34 ажылдакчызы республиканың девискээринде арга-арыг өрттерин өжүреринге дузалажыр дээш чедип келген.
Оон аңгыда, айыыл-халап-биле демиселде үш самолетту ажыглап турар. Арга-арыг болгаш бойдус сайыды Григорий Ондар сөөлгү хүннерде республикада агаар-бойдустуң байдалдары чаъс-чайыкты чагдырарынга шинчилекчи самолеттарны чедимчелиг ажыглаарынга идиглиг болганын демдеглээн.
Баштайгы медээлерден алырга, чаңныктар өрттерниң хөй кезиин болдурган, 35 өрт кижиниң буруузу-биле үнген. Арга-арыг инспекторлары өрттерге буруулуг кижилерни илередири-биле иштики херектер органнарынче, ол ышкаш Россияның ОБЯ-зының Тыва Республикада кол эргелелиниң хайгаарал болгаш профилактика ажылын башкарар девискээр килдизинче 131 билдириишкинни киирген.
2025 чылдың июль 29-тан эгелеп Тыва Республикада регионалдыг онза байдал чурумун киирип, хамаатыларның болгаш транспорт аймааның арга-арыгже кирерин шуут хораанын сагындыраал. Чыл эгезинден бээр арга-арыглар өрттеринге удур тускай чурумнуң негелделерин үрээни дээш 28 административтиг херекти оттурган.